Jambyl oblysynda frı kartobyn óndiretin zaýyt salynady
Jambyl oblysynyń ákimi Berdibek Saparbaev Nıderlandy Koroldiginiń Qazaqstan, Qyrǵyzstan men Tájikstan elderindegi tótenshe jáne ókiletti elshisi Andre Kartenspen kezdesti. Ol óńirimizde júzege asyrylatyn ortaq jobalar jaıyn pysyqtaý úshin kelgen.
Nıderlandy eliniń «Farm Frites Beheer» kompanııasy jergilikti «K-Agro Holdıng» JShS-men birlesip Shý aýdanynda Frı kartobyn óndirý zaýytyn salýdy josparlaýda. Joba quny 145 mln dollarǵa baǵalanǵan. Júzege asqan jaǵdaıda 240 jańa jumys orny qurylmaq. Jospar boıynsha zaýyt 2023 jyly qoldanysqa beriledi dep kútilýde.
Kezdesýde aımaq basshysy ınvestorlarǵa qajetti kómekti aıamaıtynyn jetkizdi. Qazirgi ýaqytta bolashaq zaýyttyń ornalasatyn jeri belgilenip qoıǵan. Oǵan qajetti ınfraqurylym da tartylǵan.
«Qazir eń basty másele – qurylysty jedel bastaý kerek. Ýaqyt ótip barady. Kásiporyn bizge kerek. Onyń shyǵaratyn ónimi eksporttalatyn bolady», - dedi Berdibek Saparbaev.
«Qurylystyń sozbalańǵa salynǵany bizdiń tarapqa da tıimsiz. Qandaı máseleler bar ekenin bilý úshin arnaıy kelip otyrmyn. Sizdiń sózińizden túıgenim, bizdiń maqsatymyz bir», - dedi Andre Kartens.
«K-Agro Holdıng» dırektorlar keńesi tóraǵasynyń keńesshisi Jeńis Óserbaıdyń aıtýynsha, ınvestorlar zaýyt salmas buryn 65 ga jerge kartop egip, ónimdilik deńgeıin baqylaýǵa nıetti.
Júzdesýge Aýyl sharýashylyǵy mınıstriniń orynbasary Nurbek Daıyrbekov te qatysty. Ortaq jobanyń keleshegi zor ekenin atap ótken vıtse-mınıstr Nıderland tarapymen ózge de jobalardy birlese júzege asyrýǵa bolatynyn tilge tıek etti.
«Bizdiń oblys agrarly-ındýstrıaldy aımaq bolyp sanalady. Kókónis, jemis-jıdek, ásirese taýly aımaq bolǵan soń alma jaqsy ósedi. Jerimiz qunarly. Qazirgi jobany júzege asyryp bolǵan soń ózge de usynystar ázirleımiz. Ózara áriptestik qatynas aýqymyn keńeıtýge daıynbyz. Investorlardyń kóbeıýine beıilmiz, - dep túıindedi Berdibek Saparbaev.