Jambyl oblysynda elektrli qarmaqpen balyq aýlaǵan brakonerler ustaldy

TARAZ. QazAqparat - Jambyl oblysynda brakonerlerliktiń taǵy bir deregi anyqtaldy, dep habarlaıdy QazAqparat tilshisi.

Baızaq aýdandyq polıtsııa bólimi tabıǵatty qorǵaý tobynyń qyzmetkerleri Aqjar aýylyndaǵy Talas ózeniniń mańynda «Volkswagen Golf» markaly avtokóligin toqtatady. Tekserý kezinde avtokóliktiń bagajy men salonynan jalpy salmaǵy shamamen 20 keli bolatyn balyq salynǵan qapshyq, rezeńke qaıyq, balyq aýlaý quraldary, tereń metall tor, elektr symdary, elektrli qarmaq apparaty, akkýmýlıator tabylady.

«Atalǵan derek boıynsha QR Qylmystyq kodeksiniń 335-baby 3-bóligi, ıaǵnı balyq resýrstaryn, basqa da sý janýarlaryn nemese ósimdikterdi zańsyz óndirý boıynsha sotqa deıingi tergeý amaldary bastaldy. Tıisti saraptamalar taǵaıyndaldy. Qazirgi ýaqytta istiń egjeı-tegjeıli mán-jaılaryn anyqtaý úshin barlyq qajetti tergeý-jedel is-sharalary júrgizilip jatyr», - dep habarlady oblystyq polıtsııa departamentiniń baspasóz qyzmeti.

Jambyl oblysynyń polıtsııa departamenti elektrli qarmaqpen balyq aýlaý zańsyz ekenin jáne múldem tyıym salynǵanyn eskertedi. Mundaı quralmen balyq aýlaý - brakonerlik qylmys. Elektrli qarmaqty qoldanýdyń zııany orasan zor, tek balyq resýrstaryn ǵana emes, sonymen birge toǵandaǵy basqa da sý janýarlary joıylady. Elektrli qarmaqty bir ret qoldanǵannan keıin sý qoımasynyń qalpyna kelýi uzaq ýaqytty alady.

Buǵan deıin Jambyl oblysynda polıtseıler 250-den astam qarý tárkilegenin jazǵan bolatynbyz.