Jambyl oblysynda demalys aımaǵy órtenip jatyr

TARAZ. QazAqparat - Jambyl oblysyndaǵy Merki aýdanynyń Merki aýylynan 14 shaqyrym qashyqtyqta ornalasqan «Turan» demalys aımaǵy órtke orandy, dep habarlaıdy QazAqparat tilshisi.

Jambyl oblystyq Tótenshe jaǵdaılar departamenti baspasóz qyzmetiniń málimetinshe, órt 20 mamyr kúni saǵat 21.56-da tutanǵan.

Sol mańdaǵy aǵashtan soǵylǵan 4 ǵımarat – ákimshilik ǵımarat, dámhana jáne eki qonaqúıdi jalyn sharpyǵan. Oqıǵa ornynda Tótenshe jaǵdaılar departamentiniń 37 qyzmetkeri men 12 tehnıkasy jumyldyrylyp, órtti sóndirip jatyr.

Saǵat 00.13-te jalynnyń taralýy toqtatyldy. Tilsiz jaý sharpyǵan aýmaqtyń kólemi anyqtalyp jatyr.

Jyl boıy qyzmet kórsetetin «Turan» demalys aımaǵy Qyrǵyz Alataýynyń baýraıynda, teńiz deńgeıinen 750 metr bıiktikte, Merki shatqalynda ornalasqan.

Aıta keteıik, 16 sáýirde Tarazdaǵy kópqabatty úıde iri órt bolyp, turǵyndar mektepke ornalastyrylǵan bolatyn. Jalyn Tóle bı kóshesi, 4 mekenjaıynda ornalasqan bes qabatty úıdiń shatyrynan shyqty. Saldarynan shatyrdyń 800 sharshy metrdi otqa orandy.

Tótenshe jaǵdaılar departamenti qyzmetkerleriniń kúshimen turǵyn úıden 100 adam evakýatsııalandy. Onyń ishinde 60-y – bala. Otty sóndirýge 13 tehnıka men 54 órt sóndirýshi jumyldyryldy.

17 sáýirde atalǵan turǵyn úıde jóndeý jumystary bastaldy.