Jambyl oblysynda bıyl 258 tótenshe jaǵdaı oryn aldy

TARAZ. QazAqparat - Bıyl 4 aı ishinde elimiz boıynsha 4 myńǵa jýyq tótenshe jaǵdaı tirkelse, onyń shamamen 7 paıyzy, ıaǵnı, 258-i Jambyl oblysyna tıesili, dep habarlaıdy QazAqparat tilshisi.

Bul týraly Tótenshe jaǵdaılar mınıstriniń mindetin atqarýshy Ibragım Kúlshimbaev oblysqa jasaǵan saparynda halyqpen kezdesý barysynda aıtty.

«Jambyl oblysynyń tótenshe jaǵdaılar departamenti 400 myńnan astam turǵyn úıdi aralady. Bul rette kópbalaly otbasylar, múmkindigi shekteýli azamattarǵa basa nazar aýdaryldy. Tórt myńnan astam úıge órt datchıkteri ornatyldy. «QazTransGaz Aımaq» ókilderimen birlesip turǵyn úılerdi aralap, gaz apparatýrasy tekserildi, turǵyndarǵa túsiniktemeler berildi», – dedi mınıstr.

Jalpy, óńirde 20 órtke qarsy bólimshe, 15 órt sóndirý beketi bar. Jyl sońyna deıin Qarakemer, Maıtóbe, Órnek aýyldarynda 3 beket qurý josparlanǵan. Sondaı-aq, jyl basynan beri respýblıka boıynsha 136 orman órti tirkelse, oblys aýmaǵynda tabıǵı órt tirkelmegen.

Mınıstrdiń aıtýynsha, oblys aýmaǵynyń kóp bóligi nemese 10 aýdannyń 8-i jer silkinisine beıim. Oblystaǵy sońǵy joıqyn jer silkinisi T.Rysqulov aýdanynda 2003 jyly tirkelgen. Naýryz aıynda Taraz qalasynda eki baldyq dúmpýler tirkeldi. El boıynsha 68 seısmostansa jumys istese, onyń tórteýi Áýlıeata óńirinde. Bıyl qosymsha taǵy 5 seısmostansa ornatylady.

Halyq aldynda esep berip, buqaralyq aqparat quraldarynyń ókilderimen suhbattasqan Ibragım Kúlshimbaev Taraz qalasyndaǵy №1 mamandandyrylǵan órt sóndirý bóliminiń aýmaǵynda azamattyq qorǵaý organdarynyń qaza tapqan qyzmetkerleriniń eskertkishine gúl shoqtaryn qoıdy. Osy bólimniń aýmaǵynda uıymdastyrylǵan tehnıka men túrli órt sóndirý-qutqarý jaraqtarynyń kórmesin tamashalap, №20 órt sóndirý bóliminiń saltanatty túrde ashylýyna qatysty.

Buǵan deıin Merki aýdanynda demalys aımaǵyndaǵy órt sóndirilgenin habarlaǵan bolatynbyz.