Jambyl oblysynda bes mekteptiń qurylysy bitpegen

TARAZ. QazAqparat – Jambyl oblysynda 17 bilim berý uıymynda kúrdeli jóndeý jumystary júrgizilip jatyr. Onyń 12-sinde kúrdeli jóndeý josparǵa saı, ýaqytyly júrgizilse, 5 mektepte jóndeý jumystary oqý jyly bastalǵanǵa deıin aıaqtalmaýy múmkin, dep habarlaıdy QazAqparat tilshisi.

Bul týraly Jambyl oblysynyń bilim salasynda sapany qamtamasyz etý departamenti basshysynyń orynbasary Jasulan Atenov óńirlik kommýnıkatsııalar qyzmetinde ótken baspasóz brıfınginde málimdedi. Atalǵan departament Oqý-aǵartý mınıstrliginiń tapsyrmasyna sáıkes, bilim berý uıymdarynyń 2023-2024 oqý jylyna daıyndyǵyna monıtorıng júrgizgen. Monıtorıngke oblystaǵy 438 jalpy orta bilim beretin mektepter qamtylady.

Jalpy, oblystaǵy 178 mektep kúrdeli jóndeýdi qajet etedi. Onyń 96-syna kúrdeli jóndeý jumystaryn júrgizý josparlanǵan. Al 82 mektepke jóndeý jumystaryn júrgizý ázirge josparda joq. Sondaı-aq monıtorıng júrgizý barysynda 129 mektepte jylytý júıesin jóndeý qajettiligi anyqtalǵan.

36 mektepte jylytý qazandyǵy ǵımarattyń ishinde ornalasqan. Munymen qosa, oblystaǵy 15 mektepte beınebaqylaý júıesi mektep aýmaǵy boıynsha qamtylmaǵan. 63 mekteptiń beınebaqylaý júıesi talapqa sáıkes kelmeıdi.

«62 bilim berý uıymynda ınternet jyldamdyǵy 4 megabıt/sek tómen. 90 mektepte ınteraktıvti taqtalardyń 50 paıyzy isten shyqqan. 70 mektepte sport zal salynbaǵan. 108 mektep sporttyq qural-jabdyqtarmen qamtamasyz etilmegen. Baızaq aýdanynda 6 mektepke, Jambylda – 9, Merkide – 5, Moıynqumda –1, Turar Rysqulov aýdanynda – 5, Shýda – 4, Sarysýda – 3, Talasta – 2, Taraz qalasynda – 1 mektepke, jalpy 36 orta bilim berý uıymyna ashana qajet», – dedi brıfıngte Jasulan Atenov.

Mektepterdegi máseleler munymen bitpeıdi. Oblystaǵy 40 mektepte arnaıy kitaphana bólmeleri qarastyrylmaǵan. Oqýshylardy tasymaldaýǵa 110 avtobýs bólingen. Biraq Shý aýdanynda – 8, Baızaqta – 9, Sarysýda – 1, Turar Rysqulov aýdanynda 5 avtobýstyń tozyǵy jetken.

Shý aýdany Tóle bı aýylyndaǵy ál-Farabı orta mektebiniń qurylys jumystary tek 70 paıyzǵa oryndalǵan. Balalar úshinshi jyl basqa 4 mektepte bilim alyp jatyr. Osy aýdandaǵy Ǵanı Muratbaev atyndaǵy orta mektebi apatty jaǵdaıda tur. Moıynqum aýdanynyń №1, V.Tereshkova jáne Aǵybaı batyr mektepterinde sý basqa jaqtan tasymaldanyp, arnaıy ydystarda saqtalady. Ájethanasy syrtta ornalasqan.

Brıfıng sońynda Jasulan Atenov jýrnalıster tarapynan qoıylǵan saýaldarǵa jaýap berdi. Buǵan deıin Jambyl oblysynda oqýshylarǵa 2 mlrd teńgege jýyq qarjy úlestiriletinin habarlaǵan bolatynbyz.