Jambyl oblysynda baıqaýshylardyń saılaýǵa daıyndyq barysy talqylandy

TARAZ. QazAqparat – Búgin M.H.Dýlatı atyndaǵy Taraz aımaqtyq ýnıversıtetinde QR Parlamentine, oblystar men aýdandardyń máslıhattaryna saılaýdy baıqaýǵa daıyndyq boıynsha Jambyl oblystyq partııalyq emes baqylaý ortalyǵynyń qyzmetimen tanysýǵa arnalǵan dóńgelek ústel otyrysy ótti, dep habarlaıdy QazAqparat.

Іs-shara barysynda baıqaýshylardyń saılaý kúni jumys isteýge daıyndyǵy, sondaı-aq aýdandar men oblys ortalyǵynda ótkizilgen oqytý semınarlarynyń barysy týraly máseleler qaraldy.

Jambyl oblysy boıynsha saılaýdy partııalyq emes baqylaý ortalyǵynyń kapıtany, «Jastar-Zerteý» JQB tóraıymy Parıda Mamedova partııaǵa jatpaıtyn baıqaýshylardyń sandyq, sapalyq quramy jáne baıqaýshynyń zańdy quzyrettiligin arttyrý mańyzdylyǵy týraly aıtty.

Shtab músheleri partııalarǵa beıtarap qatynastyń mańyzdylyǵyn jáne baıqaýdyń Saılaý týraly zańdy durys saqtaýǵa jáne saılaý ýchaskelerinde barlyq sanattaǵy azamattarǵa teń múmkindikter berýge nazar aýdarýynyń mańyzdylyǵyn qýattady. Sonymen qatar, áleýmettik qashyqtyqqa qatysty karantındik rejım talaptaryn saqtaý jáne qorǵanys quraldarymen qamtamasyz etý máselelerin talqylady.

Búgingi kúni 552 táýelsiz baıqaýshy oqýdan ótti. Olar óz mindetterin halyqaralyq baqylaý standarttaryna sáıkes oryndaýǵa daıyn. Qazaqstannyń Azamattyq alıansynan 238 baıqaýshy, Kásipodaqtar federatsııasynan 205 jáne «Jastar-zerteý» qoǵamdyq birlestiginen 109 mobıldi baıqaýshy qatysady. Barlyq qajetti qujattar: Jarǵydan úzindi, birlestikti tirkeý týraly kýálik, saılaý ýchaskesine joldama, baıqaýshy dápteri men tósbelgi Jambyl oblysynyń aýdandaryna jiberilýge daıyn.

Іs-sharaǵa 15 adam qatysty, onyń ishinde oblystyq saılaýdy partııalyq emes baıqaý ortalyǵynyń músheleri jáne azamattyq qoǵam ókilderi bar.