Jambyl oblysynda balyq óndirisi bes jylda 3,5 myń tonnaǵa jetkiziledi
Jambyl aýdanynyń «Sandel» sharýa qojalyǵynyń balyq tálimbaǵy aýmaǵynda ótken semınar barysynda óńirdegi salanyń jaı-kúıi jan-jaqty saralandy. «Sandel» sharýa qojalyǵy akva sharýashylyǵymen 2005 jyldan beri aınalysyp keledi. Inkýbatsııalyq tsehta kásiporyn 100 mıllıon dernásil men 10 mıllıon shabaq ósiriledi.
Sharýashylyq basshysy Dılmurat Husaıyn-Ahýnovtyń aıtýynsha, eki jyl ishinde dernásil óndirisin 150 mln-ǵa deıin jáne bir jyl ishinde shabaq óndirisin 15 mln-ǵa deıin ulǵaıtý kózdelýde. Munda balyq tálimbaqtaryn qalpyna keltirý sharalary qolǵa alynýda eken. Ol boıynsha toǵandar sany artyp, ınkýbatsııalyq tseh jańǵyrtylmaq. Sonymen qatar qurama jem zaýyty salynady.
Basqosýda oblys ákimi Berdibek Saparbaev aımaqtaǵy balyq sharýashylyǵyn damytýdyń mańyzy zor ekendigin, biraq, ókinishke oraı, ekonomıkanyń bul salasyna tıisti nazar aýdarylmaıtynyn, keıingi ýaqytta ol damýyn toqtatyp qana qoımaı, quldyrap bara jatqanyn atap ótti.
Aımaq basshysy balyq sharýashylyǵyn jandandyrý qajettigine kóńil bóldi. Qazirgi tańda oblys boıynsha jylyna myń tonna balyq óndirilse, al Sovet kezinde bul kórsetkish shamamen bes myń tonna bolǵan. Sol sebepti ol óńirdegi ımportqa táýeldi salanyń biri bolyp qalýda.
- Bir kezderi Jambyl oblysy iri balyq óndirýshi óńirdiń biri bolǵan. Al búginde Balqash kólinen shamamen 700 tonna balyq aýlanady, al aýylsharýashylyq kásiporyndarymen taǵy 300 tonna alynady. Bul óte az. Balyq sharýashylyǵy qaıta ekonomıkanyń mańyzdy salalarynyń birine aınalýy tıis. Memleket alǵa damyp keledi. Mal azyqtaryn sýbsıdııalaýǵa aqsha bólinýde. Biraq máseleler áli de joq emes. Oblysta balyq ósirýmen tek 60 sharýashylyq aınalysýda desek, olardyń beseýi ǵana iri qurylym sanalady. Taýarly balyq óndirisiniń kólemin arttyrý kerek. 2021 jyly bul turǵydaǵy ósimdi 2 400 tonnaǵa, 2022 jyly 3 000 tonnaǵa, 2025 jyly 3 500 tonnaǵa deıin jetkizý qajet, - dedi ákim.
Aımaq basshysy jaýapty vedomstvolarǵa balyq sharýashylǵy salasyn damytý jobasyn ázirleýdi tapsyrdy. Sonymen qatar, tehnologııany damytý jáne agrarshylardyń bilimi men praktıkalyq tájirıbesin arttyrý máseleleri de qarastyrylady.
Semınar barysynda salany damytýdaǵy kezdesip otyrǵan ózekti máseleler jáne olardy sheshý joldary jan-jaqty talqylandy. Qatysýshylar ózderin tolǵandyrǵan suraǵyn joldap, utymdy usynysyn bildirdi. Negizinen qatysýshylardyń deni sý tapshylyǵyna qatysty shaǵymdanyp, ózender men kólderdiń túbin tereńdetýdi talap etti. Sondaı-aq, olar balyq aýlaý merzimin ózgertý qajettiligin jetkizdi.