Jambyl oblysynda «Ájeler alqasy» quryldy

TARAZ. QazAqparat - Jaqynda oblystyq «Hıbatýlla Tarazı» meshiti janynan «Ájeler alqasy» qurylǵan bolatyn. Maqsaty – áıelder men jas qyzdarǵa, kelinderge halyqtyq salt-dástúrler men ádet-ǵuryptyń mańyzdylyǵyn túsindirip, olardy ustaný, baqytty otbasy qurýdyń qupııalarymen bólisý, dep habarlaıdy QazAqparat.

Bul keńes Ájeler mektebiniń negizinde quryldy. Búginde olar jas urpaqty tárbıeleý isinde qoǵamdyq ınstıtýttarmen yntymaqtasýǵa daıyn. Osyǵan aıryqsha kóńil bólgen aımaq basshysy ádet-ǵuryptarymyzdy qaıta jańǵyrtyp, ulttyq dástúrimizdi dáripteýde ájeler alqasynyń róli zor ekenin atap ótti. Óıtkeni, ájeler – halyq danalyǵynyń sarqylmas qaınar kózi, óskeleń urpaqtyń tárbıeshisi.

«Qazirgi tańda tastandy balalar, jastardyń ajyrasýy kóbeıip ketti. Osyndaı keleńsizdikterge tosqaýyl qoıý úshin ájelerimiz jas býyn-óskeleń urpaqty tárbıelep, árdaıym aqyl-keńesterin aıtyp otyrsa, tárbıeli jastar, ıbaly qyzdarymyz kóbeıip, Otbasy ınstıtýtyn nyǵaıtýǵa zor áser etetini sózsiz. Sizderge alǵysymyz sheksiz. Sizder sııaqty analardy kórgen kezde erekshe qýanamyn»,– dedi aımaq basshysy «Ájeler alqasynyń» múshelerimen kezdesýde Berdibek Saparbaev.

Qazaqstan musylmandary dinı basqarmasynyń «Áıel-Qyzdar» sektorynyń Jambyl oblysyndaǵy jetekshisi Gúljan Serikqyzy oblystyń barlyq qala jáne aýdandarynda ájeler alqasy qurylǵanyn habarlady. Qazirgi tańda alqa quramynda 76 áje bar desek, búginge deıin olarmen 7 kezdesý, 11 is-shara ótkizilgen.

Shara sońynda Berdibek Saparbaev qatysýshylardy kele jatqan merekemen quttyqtap, ájelerge estelik syılyqtar tabys etti.