Jambyl oblysynda aýdan ákimderiniń saılaýy ótedi

TARAZ. QazAqparat – Aımaq basshysy Erbol Qarashókeevtiń qatysýymen ótken oblystyq máslıhattyń kezekten tys VI sessııasynda depýtattar saılaýǵa qatysatyn aýdandar men saıası naýqan kúnin belgiledi. Bul týraly QazAqparat Jambyl oblysy ákiminiń baspasóz qyzmetine silteme jasap habarlaıdy.

Memleket basshysy bıylǵy Joldaýynda aýdan jáne oblystyq mańyzy bar qala ákimderin saılaý bastalatyndyǵy týraly aıtyp ketti. Búgingi sessııada sizdermen Prezıdenttiń osy saıası reformasyn iske asyrýdyń alǵashqy qadamyn jasamaqpyz. Óńirde 121 aýdandyq mańyzy bar qala, aýyl ákimderiniń saılaýy ótti. Jergilikti atqarýshy organdarmen saılaý komıssııalary saılaý ótkizýde mol tájirıbe jınady. Meniń oıymsha aýdandyq, oblystyq mańyzy bar qalalardyń saılaýyna tolyqtaı daıynbyz, - dedi Erbol Qarashókeev.

Oblystyq máslıhat depýtaty Meırambek Dónenbaev qanatqaqty joba boıynsha Turar Rysqulov aýdany ákiminiń saılaýyn, al onyń áriptesi Kerimqul Begalıev Jýaly aýdany ákiminiń saılaýyn usyndy. Atalǵan aýdandar boıynsha usynys bir aýyzdan maquldandy.

Al, depýtat Daýyl Beısenqulov aldaǵy jylytý maýsymyna daıyndyq sekildi mańyzdy sharalardy eskere kele, saılaý kúnin 5 qarashaǵa belgileýdi usyndy. Aıtýynsha, apta sońyna túsetin bul kún saıası naýqandy uıymdastyrýǵa qolaıly. Sessııa sońynda atalǵan máseleler men usynystar boıynsha sheshim jobasy qabyldanyp, oblys ákimi aldaǵy saıası kezeńge sáttilik tiledi.