Jambyl oblysynda «Ata men nemere» monýmenti ashyldy

TARAZ. QazAqparat - Jambyl oblysynyń Baızaq aýdanyndaǵy Mádimar aýylynda ulttyq naqyshqa negizdelgen erekshe monýment boı kóterdi. Aýylǵa mundaı erekshe monýmentti mektep bitirgenine 45 jyl tolǵan túlekter tartý etti, dep habarlaıdy QazAqparat tilshisi.

Aýyldyń ajaryn aıshyqtaı túsken monýmenttiń jalpy quny 1 jarym mıllıon teńgeni quraıdy. Monýment avtory – músinshi Suńǵat Qojaǵulov qazaqy oıý-órnek túrinde pishindelgen pálsapalyq týyndyny ata men nemere tabıǵatyna utymdy ushtastyra bilgen.

Jalpy, bul aýyl mektep túlekteriniń alǵashqy da, sońǵy da tartýy emes. Aýylǵa 1974 jylǵy azamattar «Street Workout»-ty paıdalanýǵa berse, 1972 jyly týǵan azamattar Mádimar meshitine eýro qaqpa ornatqan. 1982 jylǵy túlekter meshitke 100 adamdyq bastyrma, odan keıingiler pesh soǵyp, shatyr (palatka) syılaǵan. 1986 jylǵy azamattar qorym basyna 3 bastyrma ornatsa, 1966 jylǵy azamattar «Alǵashqy mehanızatorlar» alleıasyna eýro qaqpa salǵan.

Monýmenttiń ashylýy barysynda ıgi iske bastamashy bolǵan túlekterge aýyl ákiminiń atynan Alǵys hat tabystalyp, qarııalar aq batasyn berdi.

Buǵan deıin Tarazda qalamger Áldıhan Qaldybaevty eske alýǵa arnalǵan memorıaldyq taqta ashylǵanyn jazǵan bolatynbyz.