Jambyl oblysynda anasy qyzyna búıregin berdi

TARAZ. QazAqparat - Taraz qalalyq kópbeıindi aýrýhanasynda alǵash ret jasalǵan búırek aýystyrý operatsııasy sátti aıaqtalyp, 22 jastaǵy Uldaı Uzaqbaeva esimdi boıjetken aýrýhanadan shyqty, dep habarlaıdy QazAqparat tilshisi.

2013 jyly Uldaıdyń zaqymdanǵan eki búıregi isten shyǵyp, dıalız apparatyna tańylǵan. Syrqaty asqynǵan ol ishteı ómirden kúderin de úzgen.

« Óz betimmen boıymdaǵy suıyqtyqty syrtqa shyǵara almaıtyn edim, ony tek gemodıalızdiń kómegimen jasaýǵa bolady. Sodan soń Qaraqalpaqstannan Taraz qalasyna kóship keldik. Otbasymyzda bes aǵaıyndymyz. Ákemiz aýyr syrqattan baqılyq boldy. Anamyz jumyssyz», - deıdi Uldaı.

Qyzynyń ahýaly janyna batqan ana Jambyl oblystyq densaýlyq saqtaý basqarmasynyń basshysy Áset Qalıevke júginedi.

Naýqastyń áleýmettik jaǵdaıy men syrqatynan habardar bolǵan tájirıbeli hırýrg Áset Áskeruly jedel sheshim qabyldap, donorlyq transplantatsııa baǵdarlamasyn 5 mamyrda bastap ketedi.

Al donorlyqqa qyzdyń 56 jastaǵy anasy kelisimin bergen. 6 saǵatqa sozylǵan ota sátti ótti.

Búırek almastyrý operatsııasynan keıingi birinshi táýlikte aǵzada jınalǵan 4 lıtr zár syrtqa shyǵyp, boıjetken ózin áldeqaıda táýir sezingen.

Taldaý saraptamasy da jaqsy nátıje kórsetken. Naýqastyń jaǵdaıy jaqsarǵan soń dárigerler úshinshi táýlikten keıin patsıentti palataǵa aýystyrdy.

«Operatsııadan keıin esimdi jıǵanda maǵan ekinshi ret ómir syılaǵan anamdy eske aldym. Jaǵdaıy nasharlap qala ma dep ýaıymdadym. Qazir anamnyń da, meniń de jaǵdaıymyz jaqsy. On jyldyq azapty ómirimdi jeńildetken operatsııadan keıin kóńilim tolqyp, jylap jiberdim. Oblystyq densaýlyq saqtaý basqarmasynyń basshysy Áset Qalıev barlyq shyǵyndarymyzdy jeke qarajatynan tóledi», – deıdi Uldaı.

Aıta keteıik, óńirde búırek fýnktsııasy buzylǵan 903 patsıent dınamıkalyq baqylaýda tur.

Onyń ishinde búıregi aýystyrylǵan 64 adam jáne baǵdarlamalyq gemodıalızdegi 722 patsıent bar.