Jambyl oblysynda alǵash ret aýylda muz aıdyny ashyldy

TARAZ. QazAqparat – Merki aýdany Jambyl aýyldyq okrýgine qarasty Jemis-jıdek aýylynda muz aıdyny ashyldy. Mundaı jabyq muz aıdyny oblys boıynsha aýylda alǵash ret salynyp otyr, dep habarlaıdy QazAqparat tilshisi.

Uzyndyǵy - 30, eni - 15 metrdi quraıtyn nysan balalardyń syrǵanaq teýip, bir mezgil dene shynyqtyrýmen aınalysýyna tamasha múmkindik berip otyr.

Jobany jas kásipker Erjan Qyrǵabaqov júzege asyrǵan.

Kásipker «Atameken» ulttyq kásipkerler palatasyna jobasyn usynyp, olardyń qarjylandyrýynyń arqasynda kópten beri oıynda júrgen josparyn iske asyrǵan.

Nysannyń qurylysyn júrgizip, qural-jabdyǵyn satyp alýǵa ol 10,5 mıllıon teńge jumsapty. Eń aldymen jańa nysan aýdandaǵy buqaralyq sportty damytýǵa óz septigin tıgizeri anyq.

Jańa sport nysanynyń ashylýyna aýdan ákimi Meıirhan Ómirbek qatysyp, jas kásipkerge aýdan turǵyndary atynan alǵysyn jetkizdi.

«Nege aýylda muz aıdynyn salmasqa degen oı keldi. Jobamdy «Atameken» ulttyq kásipkerler palatasyna usyndym. Olar jobamdy qarjylandyrǵan soń osy muz aıdyny keshenin turǵyzdym. Qajetti qural-jabdyqty Almaty qalasynan tapsyryspen aldyrdym», - deıdi jas kásipker.

Erjan muz aıdynyn jyl on eki aı jumys istetpek. Aldaǵy ýaqytta nysan ǵımaratyn zamanaýı turǵyda jetildirýge nıettenip otyr.

Búgingi tańda kásipker muz aıdyny arqyly tórt adamdy turaqty jumyspen qamtyǵan. Syrǵanaq tebýge arnalǵan konkıdiń 35 jubyn ákelip qoıǵan.

Balalar men úlkenderge arnalǵan konkıdiń barlyq ólshemi bar. Muz aıdynyna kelýshiler 500 teńge tólep, bir saǵat alańsyz syrǵanaq tebe alady.

Budan bólek, kásipker jabyq muz aıdynynyń qasyndaǵy 50 sottyq jerge ashyq aspan astyndaǵy muz aıdynyn jáne jabyq basseın salýdy josparlap otyr.