Jambyl oblysynda Abaıdyń 175 jyldyǵyna arnalǵan festıval ótti
«Bilimdiden shyqqan sóz...» degen uly aqynnyń óleń joldarymen atalǵan aýqymdy sharaǵa oblystyń10 aýdanynan jáne Taraz qalasynyń mektepterinen kelgen komandalar qatysyp, óner, robototehnıka salalary boıynsha baq synady.
Shara shymyldyǵyn «Hákim Abaı» teatrlandyrylǵan qoıylymymen TarMÝ stýdentteri ashty. Saltanatty ashylýda sóz alǵan TarMÝ rektory Mahmetqalı Sarybekov jáne oblystyq bilim basqarmasy basshysynyń mindetin atqarýshy Jámılá Bekbatyrova sharanyń mańyzdylyǵyn atap ótip, qatysýshylarǵa sáttilik tiledi.
Festıvalda «Abaıdyń izimen» atty bilim salasyn damytýdaǵy ózekti máseleler boıynsha dóńgelek ústeli, «Abaıdyń qara sózderi – ónege kózderi» taqyrybyndaǵy aqynnyń óleńderi men qara sózderin jatqa oqý saıysy jáne «Ótkirdiń júzi, kesteniń bizi, órnegin sendeı sala almas» – robototehnıka olımpıadasy bir mezette ótkizildi.
Dóńgelek ústel barysynda mektep basshylary men jergilikti ýnıversıtet rektorlary mektep pen JOO qyzmetindegi sabaqtastyq máselelerin talqylady. Olardyń ishinde kadr daıarlaý, stýdentterdiń bilim sapasy, bilikti mamandardy mektepke tartý týraly kókeıtesti suraqtar kóterilip, birqatar sheshilý joldary usynyldy.
Ýnıversıtet foesinde oqýshylar qurastyrǵan robottar qazaqtyń ulttyq oıyn túrlerinen jarysqa tústi. Olar asyq atý, arqan tartys, qyz qýý sııaqty oıyndaryn oınap, eptilikterin kórsetti.
Al, Akt zalynda oblys aýdandarynan kelgen mektep komandalarynyń oryndaýynda Abaı shyǵarmalary boıynsha dramalyq qoıylymdar kórsetildi. Saıys talabyna saı oqýshylar, ata-analar men ustazdar bir sahnada óner kórsetti.
Festıval sońynda jeńimpazdar anyqtalyp, júldeli oryndar tabystaldy. Osylaısha, qazaq danasy Abaı Qunanbaevtyń 175-jyldyq mereıtoıyna arnalǵan oblystyq festıval bilim men óner ushtasqan zııatkerlik alańǵa aınaldy.