Jambyl oblysynda 60 myńǵa jýyq adam jumyspen qamtylmaq
Atalǵan kórsetkishter men atqarylatyn josparly jumystar týraly oblys ákimi Berdibek Saparbaevtyń tóraǵalyǵymen ótken apparattyq keńestiń kún tártibinde qaraldy.
Aǵymdaǵy jyly óńirde jumyspen qamtýdyń belsendi sharalarymen 58,6 myń adam qamtylady, ony júzege asyrýǵa 85,3 mıllıard teńge baǵyttalǵan. Nátıjesinde 52,4 myń adam jumyspen qamtylatyn bolsa, onyń 22,6 myńy – turaqty. Bul jumystar arnaıy ázirlengen aımaqtyq Jol kartasy aıasynda atqarylmaq. Ol týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekov baıandady.
«Aǵymdaǵy jyldyń 4 aıynyń qorytyndysy boıynsha «Eńbek» baǵdarlamasy aıasynda 9,7 myń adam jumysqa ornalasqan. Búginde kásiptik qaıta daıarlaý aıasynda 171 jambyldyq oqytýdan ótýde desek, 18 mamyrdnan bastap olardyń sany 1350 adamǵa artpaq. Sondaı-aq, 232 adam 912,1 mıllıon teńgeniń shaǵyn nesıesine qol jetkizgen»,-dedi J.Baýbekov.
Jol kartasy boıynsha ınjenerlik jáne kólik ınfraqurylymyn salýǵa, turǵyn úı-kommýnaldyq sharýashylyqty damytýǵa jáne eldi mekenderdi abattandyrýǵa 61,2 mlrd. teńge qarastyrylǵan. 19,6 myń jumys orny qurylamaq. Qazirgi ýaqytta barlyq lottar boıynsha konkýrstar ótkizilip, Qordaı aýdanynda 552 joba boıynsha jumystar bastaldy.
Jol kartasy aǵymdaǵy jaǵdaıǵa baılanysty ózgerýi de múmkin. Berdibek Saparbaev baǵdarlamany kelesi jylǵa deıin uzartýdy tapsyrdy, sondyqtan aýdan ákimderi jańa jobalardy daıyndaýy tıis.
Sonymen qatar, oblys ákimi ótken jyly berilgen shaǵyn nesıeler men granttardyń tıimdiligine taldaý júrgizýdi tapsyrdy. Jańa ShOB quryldy ma, qansha jumys orny ashyldy, salyq bazasy ulǵaıdy ma? Osy sekildi suraqtardyń barlyǵyna naqty jaýaptar berilýi tıis, jiberilgen qatelikterdi qaıtalaýǵa jol berilmeıdi.
Qajy MURAT