Jambyl oblysynda 414 jer telimi memleket menshigine qaıtaryldy
Oblystyq prokýratýrasynyń málimetinshe, jergilikti atqarýshy organnyń qyzmetine júrgizilgen taldaý jerlerdi tıimdi jáne utymdy paıdalaný maqsatynda quzyrly organdarmen júrgiziletin jumystyń tıimdiligi jetkiliksiz ekendigin kórsetken.
Atap aıtqanda, oblys boıynsha kólemi 304 myń gektar bolatyn paıdalanýsyz jatqan 1,6 myńnan astam jer telimi anyqtalǵan. Onyń 125 gektarǵa jýyǵy kommertsııalyq maqsattaǵy jer ýchaskesi. Paıdalanýsyz jatqan jer aýmaqtarynyń kadastrlyq quny 3,4 mıllıard teńgeni quraıdy.
«Prokýratýranyń aralasýynyń nátıjesinde memlekettik jer qoryna kólemi 34,8 gektardan astam 414 jer telimi qaıtaryldy. Qazirgi ýaqytta kólemi 205 myń gektardan astam 872 jer telimi ıgerildi. Bul baǵytta barlyǵy 32 zań buzýshylyq anyqtalyp, 24 usynym engizildi. Sondaı-aq, 24 laýazymdy tulǵa tártiptik jaýapkershilikke jáne 34 tulǵa ákimshilik jaýapkershilikke tartyldy»,-delingen vedomstvo málimetinde.
Aıta ketsek, jer telimderine qatysty laýazymdyq ókilettigin teris paıdalanǵany jáne qyzmettik jalǵandyq jasaǵany úshin Taraz qalasy ákimdiginiń sáýlet jáne qala qurylys bóliminiń burynǵy basshysy 4 jyl 6 aıǵa bas bostandyǵyn shekteý jazasyna sottalǵan bolatyn.