Jambyl oblysynda 41 myń gektar jer memleketke qaıtaryldy

NUR-SULTAN. QazAqparat – Jambyl oblysynda paıdalanylmaı jatqan 41 myń gektar jer memleketke keri qaıtaryldy. Bul týraly oblysy ákimi Berdibek Saparbaev málim etti, dep habarlaıdy QazAqparat tilshisi.

«Bıyl oblysta 768,5 myń gekter jerge egin egildi, bul ótken jylmen salystyrǵanda 47 myń gektarǵa artyq. Sondaı-aq, egistik jer kólemin arttyrý maqsatynda túrkııalyq ınvestorlarymen birlesip tańqýraı men qulpynaı egildi. Jáne óńirimizde alǵash ret 868 gektar jerge raps daqylyn ósirý de qolǵa alyndy», - dedi B. Saparbaev OKQ-de ótken baspasóz máslıhatynda.

Onyń aıtýynsha, atalǵan oblys aýmaǵy aýyl sharýashylyǵymen aınalysýǵa geografııalyq-klımattyq turǵydan qolaıly.

«Óńirdegi paıdalanylmaı jatqan aýyl sharýashylyǵy jerlerin memleketke qaıtarý maqsatynda arnaıy karta ázirlendi. Sonyń nátıjesinde bos jatqan 41 myń gektar jer memleketke keri qaıtaryldy. Sondaı-aq, 2025 jylǵa qaraı aımaqtaǵy balyq óndirisin 5 myń tonnaǵa deıin jetkizý josparlanyp otyr. Oblysta 142 sý toǵany bar. Odan bólek, sońǵy 3 jyl ishinde 59,1 myń gektar sýarmaly jer qaıta qalpyna keltirildi», - deıdi ol.

Buǵan deıin B. Saparbaev oblysta qýańshylyqtyń aldyn alý maqsatynda qandaı sharalardyń júzege asyp jatqany týraly aıtty.