Jambyl oblysynda 26 jylqy jaı túsip qyrylyp qaldy

TARAZ. QazAqparat – Jambyl oblysynda naızaǵaı túsip, bir úıir jylqy qyrylyp qaldy. QazAqparat bul týraly «Habar 24» telearnasyna silteme jasap habarlaıdy.

Oqıǵa Turar Rysqulov aýdanyndaǵy taýly aımaq – Tereńózek aýylynyń mańynda bolǵan.

Jurtshylyq endi aqadal malynyń aqysyn kimnen óndirerin bilmeı dal.

Nurbolat Myrzaqulov 20 jyldan beri baqsha egip, mal sharýashylyǵymen aınalysady. Sharýa osydan eki jyl buryn aýyldaǵy eki úıin kepilge qoıyp, 3,5 mıllıon teńge kóleminde jeńildetilgen nesıe alǵan. Oǵan jylqy malyn satyp alǵan. Biraq oqys oqıǵadan 10 jylqysy ólip, qorasy qańyrap qaldy. Sharýa mundaı jaǵdaı aımaqta alǵash ret bolǵanyn aıtady.

«Oıda joqta mine, qıratyp tastady. 5 mıllıon shyǵynǵa ushyradym. Endi ne qoıyp berem, bilmeımin. Aýylda kishigirim tam bar edi. Odan ajyrap qalsam myna bala-shaǵammen qaıda baramyn?», - deıdi sharýa.

N.Myrzaqulov qosa aýyldaǵy 7 úıdiń 26 bas jylqysyn naızaǵaı sulatyp túsirgen.

Qyrylǵan maldyń qunyn kimnen daýlaryn bilmegen turǵyndar aýdan ákimdiginen kómek surap otyr.

«Aýdan ákiminiń arnaıy tapsyrmasymen komıssııa quryldy. Komıssııa quramyna quzyrly organdar men zańger mamandar endi. Qazir zerdeleý jumystary júrgizilip jatyr. Másele aýdan ákimdiginiń turaqty baqylaýynda. Qazir aýyl ákimdigi men veterınarlardan qurylǵan arnaıy jasaq, qandaı da bir aýrý taramaý úshin ólekselerdi sol taý shatqalynda kómip jatyr. Sebebi jylqylar jaıylǵan bıiktikke kólikpen jetý múmkin emes», - dedi T.Rysqulov aýdany ákiminiń orynbasary Álibek Terlikbaev.