Jambyl oblysynda 240 myń adam medsaqtandyrýǵa jarna aýdaryp otyrǵan joq
Ol týraly jýrnalıstermen ótken brıfıngte «Áleýmettik medıtsınalyq saqtandyrý qory» KEAQ Jambyl oblysy boıynsha fılıalynyń dırektory Mavlıýda Boqaeva baıandady.
Spıkerdiń aıtýynsha, 11 aıda qorǵa elimizde 222,5 mlrd teńgege jýyq qarjy jınalsa, Jambyl oblysynda 7,4 mlrd teńgeden astam jarna aýdarylǵan.
«Saqtandyrylmaǵandardy qurylymyna qaraı bóletin bolsaq, 118 myńnan astamy – BJT tóleýshiler. Olar tótenshe jaǵdaı kezinde bir rettik járdemaqy alý úshin BJT tólep, keıin toqtatyp tastaǵan bolýy múmkin. Taǵy 67 825 adamnyń áleýmettik statýsy belgisiz, ıaǵnı ótken 11 aıda olardyń atyna bir de bir ret tólem túspegen. Saqtandyrylmaǵandardyń 43 103 – jumyskerler. Keıingi aılarda ártúrli sebeppen olardyń atyna saqtandyrý tólemin aýdarý toqtap qalǵan. Bul sanattyń ishinde jyl sońyna deıin salyqtan bosatylǵan shaǵyn jáne orta bıznes nysandarynyń qyzmetkerleri de bolýy múmkin», - deıdi Mavlıýda Boqaeva.
Aımaqta keıbir kásipkerlik nysandary jyl sońyna deıin saqtandyrý tóleminen bosatylǵan.
Jalpy, Jambyl oblysynda 5 387 astam shaǵyn jáne orta bıznes nysanyna jeńildik berilipti.
Onyń 4 792-y nemese 89 paıyzy jumysshylaryn saqtandyrǵan bolsa, qalǵan 595-ten astam kásiporyn qyzmetkerleri saqtandyrý júıesinen tys qalǵan.