Jambyl oblysynda 200 oryndyq balabaqsha ashyldy

TARAZ. QazAqparat – Jambyl oblysy Jambyl aýdanynda QR Tuńǵysh Prezıdent kúnine oraı 200 oryndyq balabaqsha paıdalanýǵa berildi, dep habarlaıdy QazAqparat.

Grodekovo aýylynda «Nur-Mereı» balabaqshasynyń ashylýy jergilikti turǵyndarǵa merekelik tartý boldy.

Jańa nysannyń ashylýyna aýdan ákimi Sáken Arýbaev arnaıy kelip, aýyl turǵyndarynyń qýanyshyna ortaqtasty. Bala tárbıesin, balabaqshanyń balaǵa yqpalyn tilge tıek etip, jınalǵan jurtshylyqqa izgi tilegin arnady.

«Bala tárbıesi – tal besikten» dep dana halqymyz aıtqandaı táýelsiz eldiń bolashaq búldirshinderi besikten bastap ózine laıyqty tálim men tárbıe alýy tıis. Jalpy, aýdandaǵy 23 balabaqshada 2985 búldirshin, 20 shaǵyn ortalyqta 1042 búldirshin tárbıelenýde. Búgin 200 oryndyq nysannyń halyq ıgiligine berilýi bala tárbıesine úlken qoldaý bereri anyq. Baldyrǵandardy elin súıýge, qazaq tilin qadir tutýǵa úıretý mańyzdy», – dedi aýdan basshysy óz sózinde.

Balabaqsha meńgerýshisi Balhııa Ibraevamen mekemede 6 top jumys jasaıtynyn, balalar qazaq tilinde tárbıelenetinin jetkizdi.

«Ǵımarat tıptik negizde boı kótergen. Jylý júıesi avtonomdyq. Balalarǵa qajetti jaǵdaıdyń barlyǵy jasalǵan. Bóbekjaıǵa balalardy 1 jastan qabyldaı beremiz. Bilikti mamandarymyz da, qajetti qural-jabdyqtarymyz da jetkilikti. 30 adamdy turaqty jumyspen qamtydyq. Jalpy aldaǵy ýaqytta barlyǵy 50 adamdy jumyspen qamtymaqpyz», – deıdi meńgerýshi.

Aıta keteıik, aýdan boıynsha búginde 3-6 jas aralyǵyndaǵy búldirshinderdi mektepke deıingi mekememen qamtý deńgeıi 100 paıyzǵa jetken.