Jambyl oblysynda 15 jasar jasóspirim otbasyn qurdy
«2022 jylǵy 5 shilde kúni B.Adambaev atyndaǵy orta mekteptiń 9 synyp oqýshylary A.Shambylbek pen R.Jumaǵul ata-analarynyń kelisimine sáıkes otbasyn qurǵan. A.Shambylbek, R.Jumaǵul bıyl 16 maýsymda negizgi mektepti bitirgendigi týraly attesatattaryn alyp, mektep esebinen shyǵarylǵan. Ata-analarynyń ótinishi boıynsha Saýdakent aýylyndaǵy №11 kópsalaly kolledjine oqýǵa túsýge qujattaryn tapsyrǵan», - delingen resmı aqparatta.
Bolǵan jaıtqa baılanysty keshe Sarysý aýdany bilim bóliminiń buıryǵymen arnaıy komıssııa quryldy.
«7 shilde kúni B.Adambaev orta mektebiniń pedagog-psıholog mamany, dırektordyń tárbıe isi, quqyq jónindegi orynbasary qos oqýshynyń synyp jetekshisiniń qujattaryna zerdeleý júrgizdi. Nátıjesinde materıal kámeletke tolmaǵandardyń isteri jáne olardyń quqyqtaryn qorǵaý jónindegi aýdandyq komıssııa qaraýyna usynyldy», - deıdi vedomstvodan.
Sondaı-aq, bilim bólimi atalǵan mektepte balanyń quqyqtaryn qorǵaýdy kúsheıtý, turmystyq zorlyq-zombylyqqa qarsy is-qımyl jáne jasóspirimder arasyndaǵy sýıtsıdtiń kóbeıý máselelerin sheshý jónindegi 2020-2023 jyldarǵa arnalǵan jol kartasynyń baryn aıtyp otyr.
«Atalǵan oqýshylar mektepishilik esepte joq. Mektepte oqyp júrgende olardyń boıynan teris is-áreketter baıqalmaǵan. Aqpátes Shambylbek naýryz aıynda B.Adambaev atyndaǵy orta mektebine Almaty qalasynan otbasy jaǵdaıyna baılanysty aýysyp kelgen. Mekteptiń pedagog-psıhologtary tarapynan A.Shambylbekke mektepke aýysyp kelýine baılanysty ortaǵa beıimdelýin anyqtaý jáne baqylaý maqsatynda jeke jumystar júrgizilgen», - dep túsindirdi.
Odan bólek, kámelet jasyna tolmaǵandardyń úılenýi máselesi Sarysý aýdan ákimi janyndaǵy komıssııada qaralǵan. Qazirgi ýaqytta komıssııa otyrysynyń sheshimi kútilýde.
Aıta ketsek, Jambyl oblysy bilim basqarmasynyń baspasóz qyzmetiniń málimetinshe qos jasóspirim qazir 15 jasta.