Jambyl oblysynda 15 myńnan astam oqýshy birinshi synypqa qabyldandy

TARAZ. QazAqparat - Jambyl oblysy boıynsha 2023-2024 oqý jylyna oqýshylardy 1 synypqa qabyldaý 1 sáýirde bastalyp, 1 tamyzda aıaqtalady. Ázirge óńirde 1 synypqa qujattary qabyldanǵan oqýshy sany – 15 489, dep habarlaıdy QazAqparat tilshisi.

Oblystyq bilim basqarmasy baspasóz qyzmetiniń málimdeýinshe, ótinish ata-analardan egov.kz elektrondy portaly arqyly jáne qaǵaz túrinde eki tásilmen qabyldanyp jatyr.

Ótinish bir jumys kúni ishinde qarastyrylady.

Qajetti qujattar tiziminiń qatarynda ata-ananyń ótinishi, balanyń týý týraly kýáliginiń kóshirmesi, «bala densaýlyǵy pasporty» 026/ý-3 nysany boıynsha densaýlyq jaǵdaıy týraly anyqtama, 063/ý nysany boıynsha densaýlyq jaǵdaıy týraly qujat, balanyń 3h4 kólemindegi eki fotosýreti.

Balalardy gımnazııalar men lıtseılerdiń birinshi synybyna qabyldaý úshin bilim berý uıymdary 15 maýsymǵa deıin derbes belgileıtin konkýrstyq negizde emtıhandar ótkizedi.

Jalpy, 2023-2024 oqý jylynda 1 synypqa boljam boıynsha 24 myńnan astam oqýshy keledi dep kútilip otyr.

Buǵan deıin Jalpy bilim beretin mekteptiń erekshe qajettiligi bar balany qabyldamaýy zańsyz ekendigin jazǵan bolatynbyz.