Jambyl oblysynda 145,9 myń gektar jerdi memleket menshigine qaıtarý josparlanyp otyr
Bul týraly oblys ákimi Nurjan Nurjigitovtiń tóraǵalyǵymen ótken keńeste óńirde jaıylymdyq jerlerdiń tapshylyǵyn tómendetý baǵytyndaǵy jumystar týraly baıandaǵan Jambyl oblysy ákimdiginiń jer qatynastary basqarmasynyń basshysy Baqtııar Kópbosynovtyń baıandamasynan málim boldy, dep habarlaıdy QazAqparat oblys ákimdiginiń resmı saıtyna silteme jasap.
Basqarma basshysynyń aıtýynsha, birinshi baǵyt eldi mekenderden tys ornalasqan mal jaıylatyn jerlerdi aýyldyq okrýgterge bekitýmen baılanysty.
Jyl sońyna deıin aýyldyq okrýgterge 106,9 myń gektar jer berý josparlanyp otyr. Búgingi tańda tek Jambyl aýdanynda 706 gektar jer berildi.
Ekinshi baǵyt aýyldardan bes shaqyrym radıýsta ornalasqan jaıylymdyq jerlerdi memleket menshigine qaıtarý. Jospar boıynsha – 165,6 myń gektar bolsa, 6 aıdyń qorytyndysymen - 5,0 myń gektar qaıtaryldy.
Úshinshi baǵyt - orman qory jerlerinde ornalasqan jaıylymdardy paıdalaný. Ázirge tek 132 adam 112,1 myń gektar jerdi ıelendi.
Tórtinshi baǵyt - jer paıdalanýshylarmen memorandýmǵa qol qoıý. Soǵan sáıkes, olar mal jaıýǵa kedergi jasamaýǵa mindetteledi. Búgingi tańda 2071 turǵynmen 487 myń gektar jerdi paıdalaný týraly kelisimge qol jetkizildi.
«Besinshi baǵyt paıdalanylmaıtyn aýyl sharýashylyǵy jerlerin aınalymǵa qaıtarý. Jalpy, 145,9 myń gektar jerdi memleket menshigine qaıtarý josparlanýda, 6 aı ishinde 52,6 myń gektar qaıtaryldy», - dedi B.Kópbosynov.