Jambyl oblysynda 13 qaıyrymdylyq dúkeni jumys isteıdi
Oblys jastary óńirdegi muqtajdyqtyń deńgeıin anyqtaý maqsatynda 250 myń úı men aýlany aralap, ár otbasynyń turmys jaǵdaıyna qatysty málimetti tizip shyqqan. Olar áleýmettik saýalnama toltyryp, muqtajdyqty saralady. Bul jumysua 2 myńǵa tarta erikti tartylǵan. Aımaqta oblys ákimi Asqar Myrzahmetovtiń bastamasymen volonterlik-qaıyrymdylyq jobasy bekitilip, 13 qaıyrymdylyq dúkeni ashyldy. Onyń 3-i Taraz qalasynda, 10-y aýdandarda ornalasqan. Bul erekshe dúkenderge kelýshilerge kıim-keshek tegin berilip, tegin qyzmet kórsetiledi. Zat alý úshin bar bolǵany jeke kýáligińizben kelseńiz bolǵany.
Dúkennen zat alýǵa kelgen adam mindetti túrde arnaıy derekqoryna tirkeledi. ıAǵnı mártebesi avtomatty túrde anyqtalady. Keıin muqtajdyǵyna qaraı qoldaý kórsetiledi. Búgingi kúnge deıin 900-ge jýyq turǵynnyń tizimi jasalǵan. Onyń 40 paıyzy dúkenge turaqty túrde keledi
Munda zattardy alyp qana qoımaı, ótkizýge de bolady. Ol úshin qaladaǵy iri saýda jáne halyq kóp jınalatyn oryndarda arnaıy jáshikter ornatylǵan. Búgingi kúnge deıin 5 jarym tonna kıim jınalyp, bir bóligi taratylǵan. Al olardy jónge keltirip, jýyp tazalaıtyn volonterlar bar. Olar bos ýaqytynda osynda kelip jumys isteıdi.
«Áleýmettik karta bizde 24 tarmaqtan turady. Biz olarǵa kıim, azyq-túlik beremiz. Biraq bul olardyń máselesin tolyq sheshpeıtini belgili. Sondyqtan da otbasyndaǵy jastardy oqytý, kásiptik baǵdar berý, jumyspen qamtý nemese olardy kásipke baýlý maqsatynda grant jobalarǵa tartamyz», - deıdi oblystyq jastar resýrstyq ortalyǵynyń dırektory Baýyrjan Mórbekov.
Qazir oblys boıynsha 1 myńǵa adam volonterlyq ispen turaqty túrde aınalysady. Olar jańa jyldan bastap túrli baǵytta jumys istemek. Biri áleýmettik salany tańdasa, endi biri ulttyq qundylyq, rýhanı jańǵyrý, týrızm sııaqty salalardy qalap otyr.