Jambyl oblysynda 11 myń gektar sýarmaly jer qalpyna keltirildi

TARAZ. QazAqparat – Jambyl oblysy ákiminiń orynbasary Berik Nyǵmashevtyń tóraǵalyǵymen jıyn ótip, onda «Talas-Asa» sý sharýashylyǵy kásiporynynyń ótken jyly atqarǵan jumysy men aldaǵy jospary tyńdaldy, dep habarlaıdy QazAqparat tilshisi.

Jıyn barysynda «Talas-Asa» sý sharýashylyǵy kásipornynyń basshysy Dosjan Toqbergenov ótken jyly oblysta 2 sý qoımasyna aǵymdaǵy jóndeý jáne 32 kanalǵa mehanıkalyq tazalaý jumysy júrgizilip, 11 294 gektar sýarmaly jer qalpyna keltirilgenin atap ótti.

Ótken jyly «Jumyspen qamtý jol kartasy» baǵdarlamasy arqyly Talas aýdanynda - 8 adam, Baızaq aýdanynda - 6 adam jáne Jambyl aýdanynda - 2 adam ýaqytsha jumyspen qamtylǵan.

Sonymen birge Jambyl aýdanyndaǵy «Qyzyldıhan» óndiristik kooperatıviniń tapsyrysymen oblystaǵy «Qarasý» sý qoımasyn tazalaý nátıjesinde sýarmaly jer kólemi 40 gektardan 400 gektarǵa artqan.

Jalpy atalǵan kásiporyn bıylǵy jyly da mehanıkalyq jasaq arqyly 6 aýdandaǵy uzyndyǵy 225,4 shaqyrymdy quraıtyn 51 kanaldy tazalap, sonyń nátıjesinde 8 297 gektar sýarmaly alqapty qalpyna keltirýdi josparlap otyr.