Jambyl oblysynda 1 mlrd teńgege jemazyq óndirý kesheni salyndy
Avtomattandyrylǵan óndiris kesheni jylyna 36 myń tonna jemazyq óndirýge qýatty. Atalǵan zaýyt qurylysyna 1 mlrd teńgeden astam ınvestıtsııa salyndy, 23 jumys orny ashyldy. Zaýytta qytaı burshaǵy men arpadan jasalǵan jańa jemazyq shyǵarylatyn bolady.
Nysannyń saltanatty ashylý rásiminde aımaq basshysy Kárim Kókirekbaev Indýstrııalandyrý kartasynyń ekinshi besjyldyǵy aıasynda Jambyl oblysynda atqarylyp jatqan jumystarǵa toqtaldy.
«Elbasy Nursultan Ábishuly Nazarbaevtyń bastamasymen júzege asyp kele jatqan Qazaqstannyń jańa ındýstrııalyq saıasaty - ulttyq ekonomıkany shıkizatqa táýeldilikten aryltyp, quny joǵary ónim shyǵarýǵa, qaıta óńdeý sektoryn damytýǵa jáne ınnovatsııalyq tehnologııalardy engizý arqyly eńbek ónimdiligin arttyrýǵa zor úlesin qosyp otyr.
Indýstrııalandyrý kartasynyń ekinshi besjyldyǵy aıasynda Jambyl oblysynda jalpy quny 558 mıllıard 600 mıllıon teńgeni quraıtyn 34 ınvestıtsııalyq joba júzege asyrylýda.
Bıylǵy jyly 19 mlrd teńgeniń 10 ınvestıtsııalyq jobasyn iske qosyp, onda 1500 jańa jumys ornyn ashý kózdelgen», - dedi oblys ákimi.
Sonymen qatar, aımaq basshysy avtomattandyrylǵan jemazyq óndirý zaýytyn ashýdyń oblysqa tıgizer paıdasyna da toqtalyp ótti.
«Bul zaýyt, óz kezeginde, sharýalarǵa ósimdik ónimderin ótkerýge keń múmkindik bermek.
Kásiporynnyń búginde sharýashylyqtarda bar 110 myń bas jylqy, 356 myń bas iri qara mal, 3 mıllıonǵa jýyq qoı-eshki, 1,2 mıllıon qustyń malazyǵy qoryna qomaqty úles qosatyny anyq.
Osylaısha, jańa kásiporyn oblys ekonomıkasynyń turaqty damýyna oń septigin tıgizedi dep oılaımyn. Al memleket tarapynan óńir kásipkerliginiń, onyń ishinde aýyl sharýashylyǵynyń qarqyndy damýy úshin barlyq jaǵdaı jasalatyn bolady», - dedi Jambyl oblysynyń ákimi Kárim Kókirekbaev.
Eske sala keteıik, «GOOD LOOK saýda úıi» JShS-niń saltanatty ashylýy Qazaqstan Respýblıkasynyń Tuńǵysh Prezıdenti kúni merekesine oraılastyrylǵan bolatyn.