Jambyl oblysy rekordtyq kólemde astyq jınady

ASTANA. QazAqparat - Aǵymdaǵy jyly Jambyl oblysy rekordtyq astyq jınady. Bul týraly búgin Ortalyq kommýnıkatsııalar qyzmetindegi brıfıngte Jambyl oblysynyń ákimi Kárim Kókirekbaev málim etti, dep habarlaıdy QazAqparat.

«Aýyl sharýashylyǵy salasy jaqsy kórsetkishterge jetip keledi. Bıyl 104,6 mlrd teńgeniń ónimi óndirilip, kólemi 2,6 paıyzǵa ósti. Aýyl sharýashylyǵy daqyldary 630 myń gektar alqapqa egildi. Biz agrarlyq ýnıversıtettiń ǵalymdarymen birlese otyryp, bıdaı tuqymynyń surypyn aýystyryp, jańa tehnologııa engizdik. Nátıjesinde sońǵy eki jyl qatarynan ár gektardan 24-25 tsentner dándi daqyldar aldyq. Jalpy ónim kólemi eki ese artyp, 1 mln 200 myń tonna astyq jınaldy. Bul - oblysta buryn-sońdy bolmaǵan kórsetkish», - dedi Jambyl oblysynyń ákimi.

Onyń aıtýynsh, búginde Jambyl óńirinde qant qyzylshasy, júgeri, maqsary, soıa alqaptaryn ulǵaıtý jumystary júrgizilýde.

«Bıyl qant qyzylshasy alqabyn 9,5 myń gektarǵa jetkizdik. Keńes dáýirinde oblysta 43 myń gektar qant qyzylshasy egilip, 946 myń tonna ónim alynǵan. Ótken jyly 5 myń gektar jerden 116 myń tonna qyzylsha jınalyp, ortasha ónimdiligi 232 tsentnerdi qurady. Bıyl 180 myń tonna ónim jınap, odan 18 myń tonna qant shyǵarý josparlanýda. Ol úshin Merki qant zaýytynda 1 mlrd teńgege qaıta jańǵyrtý jumystary júrgizildi», - dedi Kárim Kókirekbaev.