Jambyl oblysy prokýratýrasy NARKO SHEKTEU TARAZ telegram-botyn tanystyrdy

TARAZ. QazAqparat - Esirtki aınalymyna qarsy is-qımyldyń tıimdiligin arttyrý maqsatynda Jambyl oblystyq prokýratýra Parlament depýtattarynyń, quqyq qorǵaý jáne arnaıy organdar basshylarynyń qatysýymen «NARKO SHEKTEU TARAZ» telegram-botyn tanystyrdy, dep habarlaıdy QazAqparat tilshisi.

Atalǵan platforma nashaqorlar sanyn azaıtýdy, halyq arasynda esirtki aınalymy men tutynýdyń aldyn alýdy kózdeıdi. Negizgi fýnktsııasy jarnamasy bar saıttardy, siltemelerdi jáne esirtki satyp alý boıynsha usynystardy tabýǵa, esirtki jasyrynǵan jerlerdi anyqtaýǵa, esirtkini daıyndaý oryndary jáne qoımasy týraly aqparattardy zerdeleýge baǵyttalǵan.

Kezdesýde oblys prokýrory Nurǵalym Ábdirov jastar arasynda arnaıy saýalnama júrgizilgenin aıtty. Prokýrordyń derekterine qaraǵanda, saýalnama nátıjesinde stýdentter men orta mektep oqýshylarynyń shamamen 47 paıyzy áleýmettik jeli arqyly sıntetıkalyq esirtki satyp alý qoljetimdi ekenin rastaǵan. Munan soń arnaıy jumys toby qurylyp, bir aı ishinde sıntetıkalyq esirtkini nasıhattaıtyn 400-den astam siltemeler men saıttar anyqtalǵan. Onyń 100-ge jýyǵy joıylyp, qalǵandary buǵattalý satysynda eken.

Kezdesý barysynda qatysýshylar pılottyq jobany engizý, iske qosý jáne ózara is-qımyldyń tıimdiligin arttyrý týraly birlesken jospardy qabyldady.

Aıta keteıik, buǵan deıin Shý aýdanynda 280 kelige jýyq esirtki tárkilengenin habarlaǵan bolatynbyz. Jambyl oblysynyń polıtseıleri Belbasar aýylynyń mańyndaǵy qumdy aımaqta ornalasqan «Sarǵaý» ýchaskesinde asa iri mólsherde esirtki zatyn saqtady degen kúdikpen 42 jastaǵy jergilikti turǵyndy ustady.