Jambyl oblysy Arysty qalpyna keltirý boıynsha óz jumystaryn aıaqtady
Búgin Arys qalasynda Jambyl oblysyna bólingen 3-sektordaǵy qurylys jumystarynyń aıaqtalýyna oraı saltanatty shara ótti. Oǵan jergilikti turǵyndarmen birge jumys júrgizgen birqatar qurylysshylar qatysty.
«Jıyndy Túrkistan oblysy ákiminiń birinshi orynbasary Qosman Aıtmýhametov sóz sóılep, ashty. Oblystan arnaıy at basyn burǵan bir top jambyldyqty aımaq basshysynyń orynbasary Erkebulan Daýylbaev bastap keldi. Erkebulan Ábilhanuly óziniń alǵysózinde Jambyl oblysy shtabynyń qarqyndy jumysy, arystyqtardyń belsendiligi men yqylasy týraly aıryqsha aıtyp ótti. Sondaı-aq, qalada oryn alǵan tótenshe jaǵdaıdyń zardaptaryn joıýǵa jumyla atsalysqan kópshilikke alǵysyn bildirip, mundaı oqys oqıǵa endi elimizde oryn almaýyn tiledi. Sondaı-aq Túrkistan oblysy ákiminiń keńesshisi Ulasbek Sádibek, Jambyl oblystyq máslıhatynyń hatshysy Baǵlan Qarasholaqov, Arys qalasynyń ákimi Murat Bolatuly Qadyrbekke jáne taǵy basqa qurmetti qonaqtar jambyldyq qurylysshylardyń tabandy jumysyn, eleýli eńbegin tilge tıek etti»,-delingen oblys ákimdigi taratqan aqparatta.
Salttanatty jıyn «Arysty terbetken Áýlıeata áýenderi» atty K.Ázirbaev atyndaǵy Jambyl oblystyq fılarmonııasynyń kontserttik baǵdarlamasyna ulasty. Onyń barysynda Arysqa arnaý aıtylyp, ásem ánder men bıden shashý shashyldy.
Budan bólek, aıanbaı ter tókken, shtab jumysynyń basy-qasynda júrgen bir top azamat pen qurylysshylar marapattaldy.
Shara aıasynda 4 úı saltanatty túrde paıdalanýǵa berildi. Ol úılerdiń ekeýi tolyǵymen qaıta salynsa, ekeýi tolyq jańǵyrtyldy. Qurylysyn júrgizgen merdiger kompanııa atalǵan úı ıelerine óz syı-sııapattaryn jasady.
Aıta keteıik, Arys qalasyndaǵy Jambyl oblysynyń shtabyna qarasty 3-sektorǵa 11 kóshe bekitilgen. Onda 312 jeke turǵyn úılermen birge 14 áleýmettik jáne kommertsııalyq nysan bary anyqtalǵan bolatyn. Zerdeleýden ótken jeke turǵyn úıdiń barlyǵynyń aqaý aktileri toltyrylyp, smetalaý jumystary jasaldy. Nátıjesinde qıraǵan 4 úıdiń ekeýi jańadan turǵyzylyp, ekeýi tolyq jańǵyrtyldy. Qalǵan 309 úıge ártúrli jóndeý jumystary júrgizilip, qalpyna keltirildi. Bul jumystarǵa 4 merdiger kompanııa, 500-den asa qurylysshy tartyldy.Tıisti shyǵyndar respýblıkalyq bıýdjet pen arnaıy qorǵa jınaqtalǵan qarjydan qarastyryldy.
Áýlıeatalyqtar arystyq aǵaıyndarǵa budan ózge de túrli qoldaýlar kórsetkenin budan buryn da habarlaǵanbyz. Atap aıtar bolsaq, ondaǵy zardap shekken azamattarǵa kómek kórsetý boıynsha «Arys. Biz birgemiz!» respýblıkalyq aktsııasy aıasynda Taraz qalasynda 4 qabyldaý pýnkti ashyldy. Nur Otan partııasynyń oblystyq jáne aýdandyq fılıaldaryndaǵy arnaıy pýnktterde jınalǵan kómek materıaldary, azyq-túlik pen birinshi qajettiliktegi zattar Arysqa jetkizildi. Barlyǵy 400 tonnadan astam gýmanıtarlyq kómek, azyq-túlik, turmysqa qajetti buıymdar jóneltilgen. Ol ǵana emes, turǵyndarǵa medıtsınalyq kómek kórsetý úshin 2,2 mıllıon teńgege qajetti dári-dármegimen qamtylǵan arnaıy jasaqtalǵan 4 reanımobılmen 8 feldsher Arys qalasyna jiberildi. Sondaı-aq, Arys qalasynyń 400-ge jýyq balasy Jambyl oblysyndaǵy jazǵy saýyqtyrý Taý samaly, Juryndysaı, Juldyz syndy lagerlerinde demaldy.