Jambyl oblystyq qazaq drama teatry Qyrǵyzstanda úzdikter qatarynan kórindi

TARAZ. QazAqparat - Qyrǵyz Respýblıkasynyń Talas qalasynda «Adamzattyń Aıtmatovy» atanǵan qyrǵyz halyq jazýshysy Shyńǵys Aıtmatovtyń 95 jyldyǵyna oraı Taý teatrlarynyń ІІ festıvali ótti, dep habarlaıdy QazAqparat tilshisi.

Festıvalge Asqar Toqpanov atyndaǵy Jambyl oblystyq qazaq drama teatry Shyńǵys Aıtmatovtyń «Jámıla» lırıkalyq dramasymen qatysty.

Tórt kúnge sozylǵan festıval qorytyndysy boıynsha Jambyl oblystyq qazaq drama teatry «Uly jazýshy Shyńǵys Aıtmatovtyń shyǵarmasyn eń úzdik sahnalaǵany úshin» nomınatsııasymen jáne qarjylaı sertıfıkatpen marapattaldy.

«Munymen qosa, «Jámıla» lırıkalyq dramasynda Seıit rólin somdaǵan teatrymyzdyń jas akteri Anýar Ýálıhanuly úzdik oıyn kórsetken joǵary akterlik sheberligi úshin «Manas» medalimen marapattaldy. Festıval júldeleri men marapattaryn Qyrǵyz Respýblıkasy Mádenıet mınıstriniń birinshi orynbasary Qaırat Imanalıev tabystady. Festıval aıasynda sondaı-aq, Talas oblystyq Qapar Medetbekov atyndaǵy mýzykalyq drama teatry men bizdiń oblystyq teatr basshylary arasynda qazaq-qyrǵyz eli arasyndaǵy rýhanı, mádenı yntymaqtastyqty, shyǵarmashylyq baılanysty nyǵaıtý maqsatynda ekijaqty memorandýmǵa qol qoıyldy», – deıdi A. Toqpanov atyndaǵy Jambyl oblystyq qazaq drama teatrynyń baspasóz hatshysy Janat Tólendıev.

Buǵan deıin jańadan balalar teatr trýppalary men stýdııalary ashylatynyn habarlaǵan bolatynbyz.