Jambyl oblystyq fılarmonııasynyń ánshisi halyqaralyq festıvalde bas júlde aldy

TARAZ. QazAqparat - Qyrǵyz elindegi Cholpon-Ata qalasynda ótken «Making Asia» tanymal mýzyka oryndaýshylardyń ІІІ Halyqaralyq Ystyqkól festıvaline K.Ázirbaev atyndaǵy Jambyl oblystyq fılarmonııasynyń ánshisi Aına Qalmaǵanbetova qatysty, dep habarlaıdy QazAqparat tilshisi.

Úsh kúnge sozylǵan mýzykalyq talanttar baıqaýynda Qazaqstan, Qyrǵyz, Ózbekstan, Ázirbaıjan, Vengrııa, Túrkııa, Soltústik Kıpr syndy elderden 18 ben 35 jas aralyǵyndaǵy 17 jas oryndaýshy baq synady. Aına baıqaýdyń alǵashqy kúni Tólegen Muhamedjanovtyń «Qus joly» ánin, ekinshi kúni Erık Karmenniń «All By myself» álemdik hıt ánin joǵary deńgeıde oryndap, úlken qoshemetke ıe boldy.

Baıqaý qorytyndysynda Aına Qalmaǵanbetova bas júldeni jeńip alyp, 5000 dollardyń sertıfıkatyn ıelendi.

Aına Qalmaǵanbetova ánshi, kompozıtor retinde buǵan deıin de óner jobalary men halyqaralyq konkýrstardyń laýreaty atanǵan. QR Prezıdentiniń «Qurmet» memlekettik nagradasymen marapattalǵan.

Aıta keteıik, 2013 jyly ótken «Making Asia» birinshi mýzykalyq festıvalinde Dımash Qudaıbergen elimizdiń namysyn qorǵap, bas júldeni ıelengen bolatyn.

Buǵan deıin Jambyl oblysyndaǵy Prezıdent rezıdentsııasy oqý-saýyqtyrý ortalyǵy bolyp qaıta ashylǵanyn jazǵan bolatynbyz.