Jambyl Ahmetbekov shtaby shymkenttik jastarmen kezdesti

NUR-SULTAN. QazAqparat - Prezıdentikke úmitker Jambyl Ahmetbekovtiń Shymkent qalalyq saılaýaldy shtabynyń jetekshisi Nurlan Qadyrqulov jáne partııa komıtetiniń belsendileri Indýstrıaldy-tehnıkalyq kolledjde stýdent jastarmen kezdesti. Bul týraly Qazaqstannyń kommýnıstik halyq partııasynyń baspasóz qyzmeti habarlady.

Nurlan Qadyrqulov jastarǵa QKHP-nyń saılaýaldy tuǵyrnamasyn túsindirdi. Ol partııa ustanymynyń mańyzyna toqtalyp, kommýnıstik tárbıeniń negizgi tetikterin atap ótti. Sonymen qatar, partııanyń teris qundylyqtarǵa qarsy jumystaryn tilge tıek etti.

Sondaı-aq qazirgi tańda jastardyń memleket taǵdyryna alańdaýshylyǵy báseń ekenin, olardyń túrli oqıǵalarǵa beıjaı qaraýy beleń alyp bara jatqanyn baıandady. QKHP ókili bul jaǵdaıdy túzetýge barynsha atsalysatynyn jetkizdi. Sonymen birge, qalalyq shtab jetekshisi qazirgi jastardyń tárbıesine, JOO túlekteriniń eńbek naryǵyndaǵy jumyssyzdyq máselesine de toqtaldy.

«Bul máselelerdi sheshý úshin jańa tásil qajet, qoǵamnyń zamanaýı talaptaryna súıený kerek» dedi ol.

Nurlan Qadyrqulov jastardyń ózin-ózi tanytýyna múmkindik jasaý - QKHP basty basymdyqtarynyń biri ekenin atap ótti. QKHP úmitkeri óziniń saılaýaldy baǵdarlamasynda jastar úshin alǵashqy kepildengen jumys ornyn engizýdi talap etetinin aıtty.

Jıynǵa qatysqan jastar salaýatty ómir salty, shákirtaqynyń kólemi, jastardyń bos ýaqytyn uıymdastyrýǵa qatysty máselelerdi kóterdi.

Jıyn sońynda shtab jetekshisi jınalǵan kópshilikke alǵys aıtyp, jastardy prezıdent saılaýyna qatysýǵa shaqyrdy.