Jambyldaǵy jol apaty: qaza tapqan polıtseıler «Aıbyn» ordenine usynylatyn boldy
Jambyldyqtar Merki–Shý–Býrylbaıtal respýblıkalyq mańyzy bar tasjolynda qyzmet atqarý barysynda jol apaty saldarynan qaza bolǵan polıtsııa qyzmetkerleri Ǵalym Arystanbaev pen Abylaıhan Ábishkendi aqtyq saparǵa shyǵaryp saldy. Janazaǵa marqumdardyń otbasy, aǵaıyn-týystarymen qatar Jambyl oblystyq polıtsııa departamentiniń bastyǵy Armanbek Baımýrzın, QR ІІM ózindik qaýipsizdik departamentiniń bastyǵy Arman Sadanov, QR ІІM kadr saıasaty departamenti bastyǵynyń orynbasary Oljas Myrzabekov, Jambyl oblysy ákiminiń orynbasary Serik Sálemov, oblystyq PD bastyǵynyń orynbasarlary, birge qyzmette bolǵan áriptesteri, dostary qatysty.
Sondaı-aq qoshtasý jıynynda QR Іshki ister mınıstri Erjan Sádenovtiń, Jambyl oblysynyń ákimi Erbol Qarashókeevtiń qazaǵa baılanysty kóńil aıtý hattary oqylyp, qaıǵyǵa ortaq ekendigi jáne marqumdardyń otbasyna memleket tarapynan árdaıym qoldaý jasalatyny jetkizildi.
— Áriptesterimizdiń qyzmet barysynda, kenetten qaza bolýyna baılanysty sýyq habar barshamyzdyń qabyrǵamyzdy qaıystyrdy. Jas bolsa da óńirdegi qaýipsizdikti saqtaý, qoǵamdyq tártipti qadaǵalaýda ólsheýsiz óz úlesterin qosa bilgen azamattardyń áli de halyqqa berer paıdasy mol edi. Olar minsiz qyzmetterimen qatar, otbasynda úlgili áke, jaqsy jar, jaqyndaryna qamqor, aınalysyna janashyr boldy. Artynda qalǵan otbasy, balalary men jubaıyna árqashan qoldaý jasap, qamqor bolamyz dep senim bildiremin. Batyrlardyń jarqyn beınesi men abyroıly esimi árdaıym jadymyzda saqtalady, — dep Armanbek Baımýrzın qaza bolǵan áriptesteriniń jaqyndaryn sabyrǵa shaqyryp, kóńil bildirdi.
Marqumdardyń janazasy óz týǵan jerlerinde — Ǵalym Arystanbaev Merki aýdanynda, Abylaıhan Ábishken Talas aýdanynda ótkizildi.
Qaza bolǵan polıtsııa qyzmetkerleri «Aıbyn» ordenine usynylatyn bolady.