Jambyldaǵy jantúrshigerlik jol apaty: Qaza bolǵan polıtseıdiń biri - 11 balanyń ákesi

<p>ASTANA. KAZINFORM - Jambyl oblysyndaǵy jantúrshigerlik jol apatyna qatysty jańa derekter shyqty. Onda qaza bolǵan eki polıtseıdiń biri 11 balanyń ákesi ekeni aıtylǵan.&nbsp;</p>

"2024 jyldyń 17 tamyzynda saǵat 01:00 shamasynda "Merki - Shý - Býrylbaıtal" respýblıkalyq mańyzy bar avtojolynyń 40-shaqyrymynda aýyr jol-kólik oqıǵasy boldy. 25 jastaǵy Toıota Alfard avtokóliginiń júrgizýshisi qarsy jolaqqa shyǵyp, Shkoda Oktavııa patrýldik polıtsııa kóligimen soqtyǵysqan.

Apat saldarynan jol qaýipsizdigin qamtamasyz etý úshin júrgen qyzmettik kóliktegi eki patrýldik polıtsııa qyzmetkeri qaza tapty. Qaıtys bolǵan polıtsııa qyzmetkerleriniń biri 11 bala tárbıelep otyrǵan kóp balaly áke" delingen QR ІІM baspasóz qyzmeti taratqan habarlamada.

Toıota Alfard kóliginde 8 jolaýshy bolǵan. Olardyń tórteýi sol jerde qaza bolyp, úsh jolaýshy men júrgizýshi ártúrli dárejedegi dene jaraqattarymen aýdandyq ortalyq aýrýhanaǵa jatqyzyldy.

Atalǵan derek boıynsha QR QK 345-baby 4-bóligimen sotqa deıingi tergeý bastaldy. Polıtsııa muqııat tergeý júrgizip, oqıǵanyń mán-jaıyn anyqtaý boıynsha barlyq qajetti sharalardy qabyldaýda.