Jambylda jetim balalardy baýyryna basqan eki polıtseı bar

<p>TARAZ. KAZINFORM — Jambyl oblysynyń polıtseıleri balalar úıiniń jetkinshekterine jańa ómir syılady. <a href="https://polisia.kz/zhambyl-oblysynyng-politsejleri-balalar-ujining-tarbielenushilerine-zhanga-omir-syjlady/" target="_blank" rel="noopener">Polisia.kz</a> óz qyzmetimen qosa ata-ana mindetin múltiksiz atqaryp júrgen ofıtserlerdiń hıkaıasyn áńgimeleıdi. </p>

Jambyl oblysynyń polıtsııa departamentinde qaýyrt jumysymen qatar, qaıyrymdy is jasaýdy ómir saltyna aınaldyrǵan qyzmetkerler jetkilikti. 

Polıtsııa kapıtany Ǵalym Arystanbaev úsh týǵan ulymen birge segiz balany baýyryna bassa, polıtsııa podpolkovnıgi Dılıafrýz Kenjehanova — óziniń bes balasyna qosa tórt ul-qyzdy tárbıelep otyrǵan kópbalaly ana.

Úsh ulynyń artynan tulymy jelbiregen qyz balasyn armandaǵan Jambyl oblysy polıtsııa departamentiniń patrýldik polıtsııa batalonynyń ınspektory Ǵalym Arystanbaev pen jubaıy Álııa ózderi jıi baryp turatyn balalar úıine kezekti ret atbasyn burady. 

Bir úıdiń adamdaryndaı tatý-tátti turatyn balalardyń bireýin alyp keterde bir-birin qımaı, kózderine jas tolǵanyn kórgen polıtseı olardy aıyrmaıyq degen oımen segiz birdeı balany asyrap alǵan. 

Alǵashynda týystary qatty tańǵalyp, keıbiri tipti qarsy bolypty, biraq qazir olar materıaldyq jaǵynan da, rýhanı turǵydan da kómegin aıamaıdy.

Balalardyń arasynda ázirbaıjan, ózbek, orys, qytaı ulty bar bolǵanymen, olardyń barlyǵy da qazaq tilinde sóılep, qazaq mektebinde bilim alady.

Jary Álııa — pedagog maman, alaıda úıde balalardyń tárbıesimen aınalysady. 

5 ul men 6 qyzdan quralǵan 11 balaly Arystanbaevtar otbasy aýyzbirshiliktiń arqasynda oblystyq «Mereıli otbasy» konkýrsynyń jeńimpazy atanyp, respýblıkalyq baıqaýdyń fınalısi bolǵan. 

Sonymen qatar polıtsııa ınspektory «Qazaqstannyń 100 jańa esimi» jobasynyń jeńimpazdary qataryna kirdi.

Polıtsııa departamentiniń jergilikti polıtsııa qyzmeti basqarmasynda kámeletke tolmaǵandar isi qyzmetinde júrgen Dılıafrýz Kenjehanova ádettegideı jumys babymen Sharapovtar otbasymen tanysýǵa barady.

Kámeletke tolmaǵan 4 jasóspirimniń qandaı jaǵdaıda ómir súrip jatqanyn kórgen polıtsııa qyzmetkeriniń júregi qan jylaǵan.

Ul balalardyń ústi-basy kir, al qarshadaı qyzdyń ydysty muzdaı sýmen jýǵanyn kórip jany aýyrady. Ózi de bes balanyń anasy Dılıafrýz kóz jasyn tııa almaı, jylap jibergen.

Foto: Polisia.kz

Ol sol sátte-aq balalardy qamqorlyǵyna alamyn dep sheshim qabyldaǵan. Onyń bala asyrap alý týraly qadamyn joldasy men týǵandary da túsinistikpen qabyldaǵan. 

Ákesi joq, anasy qaıtys bolǵan 4 balany sol kúnge deıin kúnin áreń kórip júrgen atasy asyrap kelgen.

Polıtsııa podpolkovnıgi qarııany da 9 balamen birge úıine panalatqan.

Toǵyz bala tárbıelep otyrǵan batyr anany el Prezıdenti Qasym-Jomart Toqaev «Qurmet» ordenimen, Іshki ister mınıstri «Alǵys» músinshesimen marapattady.

Qazirgi tańda D. Kenjehanova áıelderdi zorlyq-zombylyqtan qorǵaý bóliminde názik jandardyń joǵyn joqtap, quqyǵyn qorǵap júr.  

Qamqorlyqqa zárý búldirshinderdi túri men tiline qaramaı baýyryna basyp, kópke úlgi bolǵan bul otbasylar búginde balaly úı bazar bolyp, tatý-tátti kún keshýde.

Júregi meıirimge toly eki polıtseı de — otbasymen qatar óz qyzmettik mindetterin minsiz oryndap júrgen úlgili ofıtserler.