Jambylda negizsiz tólengen 147,1 mln teńge bıýdjetke qaıtaryldy

<p>TARAZ. KAZINFORM &ndash; Jambyl oblysynda jyl basynan beri júrgizilgen taldaý jáne monıtorıng jumystarynyń nátıjesinde bıýdjetke 147,1 mln teńge óndirildi.</p>

Onyń ishinde densaýlyq saqtaý salasy boıynsha 119 mln, sport salasy 17,9 mln, áleýmettik salasy 3,8 mln jáne sýbsıdııadan 6,4 mln. teńge, bári negizsiz tólengen qarajattar bolǵandyqtan bıýdjetke qaıtaryldy.

«Engizilgen usynystardyń nátıjesinde qosymsha qarajat bólinbesten 2,8 km uzyndyqtaǵy qabyrǵalary buzylǵan «Raıs» kanalynyń eni 2 metrden 3,5 metrge keńeıtilip, Jambyl aýdanyndaǵy 62 sharýa qojalyǵy sýarmaly sýmen qamtamasyz etildi. Sondaı-aq, aýyl sharýashylyǵy jáne bızneske arnalǵan 938,6 gektar jer ýchaskeleri, Sibir jarasy oshaǵy janynda ornalasqan 24 gektar jer ýchaskeleri memlekettik qorǵa qaıtaryldy. Jáne jekege ótip ketken «Aısha bıbi» sý doby Klýb» JShS memleketke qaıtarylyp, onyń menshik nysany «KMM» bolyp ózgertildi. Áleýmettik saladaǵy 140 qoǵamdyq jumysqa tartylǵan adamdar naqty jumys jasamaǵany belgili bolyp, olarmen kelisim shart buzylý arqyly 73 mln tólenýge tıis aqsha únemdeldi», - deıdi Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti basshysynyń birinshi orynbasary Dáýren Omarov.

Jáne turǵyn úı qatynastary salasyndaǵy monıtorıng nátıjeleri boıynsha oblystyń 4 aýdanynda turǵyn úı alýǵa negiz bolmaǵan 474 azamat tizimnen shyǵarylǵan. Biryńǵaı memlekettik satyp alý júıesi arqyly taýar men qyzmetterdiń satyp alýy barysyndaǵy baǵa joǵarylaýyna júrgizilgen monıtorıngpen 937 mln teńge bıýdjet qarajaty únemdeldi.

«Bızneske jol» jobasy sheńberinde aýyl sharýashylyǵyn sýbsıdııalaý, áleýmettik qorǵaý jáne jer salalaryndaǵy júıeli táýekelder joıylyp 815 kásipkerdiń quqyqtary qorǵaldy. Volonterlardyń jumysyn únemi úılestirý arqyly jetildirýde. Osylaısha, qoǵamdyq baqylaý aıasynda eriktilerdiń kúshimen 13 áleýmettik nysandardaǵy kemshilikter joıyldy, 197 mln teńgege satyp alynatyn taýarlardy negizsiz asyra baǵalaýǵa jol berilmedi, 920-dan astam azamatqa konsýltatsııalyq kómek kórsetildi.

Jalpy alǵanda jyl basynan beri sybaılas jemqorlyqqa qarsy mádenıet qalyptastyrý maqsatynda 248 is shara ótkizilip, departamenttiń bastamasymen qazan aıynan «Parasat elshisi» respýblıkalyq baıqaýy bastama aldy.

Aıta ketsek, biz buǵan deıin jas mamannyń Oqý-aǵartý mınıstrine Jambyl oblysyndaǵy sybaılas jemqorlyq týraly shaǵymdanǵanyn jazǵan bolatynbyz.