Jambylda aýrýhanada jatqan sarbaz jaıly túrli alypqashpa sóz tarady — mınıstrlik

<p>ASTANA. KAZINFORM &mdash; Qorǵanys mınıstrligi Jambyl oblysy Gvardeısk garnızonynda aýrýhanada jatqan sarbazdyń jaǵdaıyna oraı resmı málimdeme jasady.&nbsp;</p>

Eske sala keteıik, bul sarbaz 9 maýsymda pnevmonııa dıagnozymen Qordaı aýrýhanasynyń jansaqtaý bólimine túsken bolatyn. 

Vedomstvonyń aıtýynsha, sodan beri buqaralyq aqparat quraldary men áleýmettik jelilerde Gvardeısk garnızonynyń áskerı qyzmetshisin aýrýhanaǵa jatqyzý sebebi týraly shyndyqqa saı kelmeıtin aqparat tarap jatyr. 

Bastapqyda áskerı qyzmetshi medıtsınalyq bólimge ózin álsiz sezinip, qyzýy kóterilgenin aıtyp júgingen. 

Medıtsınalyq tekseristen keıin ol Gvardeısk garnızonyndaǵy áskerı gospıtaldiń juqpaly aýrýlar bólimine jetkizilip, áskerı qyzmetshige ekijaqty polısegmentti pnevmonııa dıagnozy qoıyldy.

Budan keıin ol shuǵyl túrde Jambyl oblysy Qordaı aýdanynyń ortalyq aýrýhanasyna aýystyryldy. 

«Búgingi kúni naýqastyń jaǵdaıy aýyr dep baǵalanyp otyr. Qazir oǵan barlyq qajetti medıtsınalyq kómek kórsetilýde. Sonymen birge onda Qorǵanys mınıstrligi áskerı klınıkalyq gospıtaliniń quramyna anestezıolog, reanımatolog jáne terapevt dárigerler kiretin kóshpeli brıgadasy jumys istep jatyr» deıdi medıtsına qyzmeti polkovnıgi Erjan Smaıyl.

Aıta keteıik, áskerı qyzmetshi emdeý mekemesine túsken kezde onyń denesinen kógergen nemese zaqymdaný izderi tabylǵan joq.

«Sondyqtan buqaralyq aqparat quraldary ókilderi men azamattardan tek resmı aqparat kózderine senýdi suraımyz» deıdi mınıstrlikten. 

Keshe Aıagóz garnızonynda oqý-jattyǵý kezinde sarbaz mert bolǵan edi.