Jambylda alty jylda 6 úı soqqan áýlet turady
Áńgimeni áriden bastasaq, Bazarkúl Kebekbaeva (Oljabaeva) 41 jasynda 6 ulmen jesir qalǵan eken. Joldasy Nurmahan Oljabaev temirjolshy bolyp eńbek etken. 45 jasynda aýyryp, ómirden ozypty.
Ras, ol zamanda shıetteı balamen jastaı jesir qalsa da, ómirdiń túrli synaǵyna moıymaı, shańyraǵynyń tútinin tútetip otyrǵan qazaq analary az bolmady. Degenmen, 6 baýyrdyń bári de bir aýylda shańyraq kóterip, sharýa qojalyqtarynyń sharýalaryn birge júrgizip, kez kelgen júkti jumyla kóteretin uıymshyl shańyraq búginde kemde-kem.
Biz bul áýletke at basyn tiregen kúni qýanyshty sátke tap boldyq. Aǵaıyndylar birigip, úlken aǵalary Talǵat Oljabaevqa sý jańa kóliktiń kiltin tosyn syı jasap tabystap jatyr eken. Ádette mereıtoıda, týǵan kún sekildi dataly kúnderde ul-qyzdarynyń ákelerine, analaryna baǵaly syı jasap jatqanyn jıi kóremiz. Baýyrlardyń sebepsiz-aq ıgilikti iste aýyzbirshilik tanytýlary ashyǵyn aıtqanda, neken-saıaq ekeni ras. Al, áýlettegi ár otbasyna tıesili qojalyqtardan túsken tabys tek bir adamnyń qolyna jınaqtalyp, sol tabystyń basyn qosyp, ár jylda ár baýyrdyń birine záýlim úı turǵyzǵan aǵaıyndylardy she, kórgen be edińiz?! Yntymaq-birliktiń arqasynda 6 baýyrdyń barlyǵy da nebári alty jylda eki qabatty záýlim úıdiń qonys toıyn toılaǵan. Taǵy bir aıta keterligi, atalǵan áýlette búginde 1 «Altyn alqa», 3 «Kúmis alqa» ıegeri, 6 kópbalaly ana bar.
Qara shańyraqqa áýlettiń uldary men kelinderi, nemereleri áp-sátte-aq jınalyp qaldy. Áýlettiń úlkeni Talǵat Nurmahanuly áńgimeni áriden bastady. Aıtýynsha, úlken atalary Oljabaı Ótegenov – Ekinshidúnıejúzilik soǵystyń ardageri. Keıinnen «Talapty» ujymsharyna 15 jyldaı, Dıqan bólimshesine 20 jyldaı tóraǵa bolǵan.
Oljabaı soǵysqa attanarda jubaıynyń aıaǵy aýyr bolǵan. «Sábıdiń tegin meniń atymmen jazdyryńdar. Maıdanda qaza tapsam, esimim atalyp júrsin», – dep amanat aıtyp ketken eken. Sodan ómirge kelgen sábı «Nurmahan Oljabaev» atanypty. Qýanyshqa oraı, Oljabaı maıdan dalasynan aman-esen oralyp, 9 ul-qyz súıip, ósip-ónipti. Biz áńgimelesip otyrǵan uldar – osy Nurmahannyń perzentteri.
Ákeleri dúnıeden ozǵanda úlken ul – Talǵat 21 jasta, kishi uly Baqtııar – 8 jasta bolǵan eken. Jaratýshynyń kómegimen altyn asyqtaı uldaryn bereke-birlikke baýlı bilgen, otbasynyń uıytqysy bolǵan Bazarkúl apany osydan úsh jyl buryn 75 jasynda uldary arýlap aqtyq saparǵa shyǵaryp salypty. Aǵaıyndy 6 uldyń ekeýi de ókinishke qaraı, búginde baqılyq. Kóńilge demeý bolary, ekeýiniń de otbasy jáne urpaqtary bar. Jaratýshynyń synaǵyn bastan keship otyrǵan qos abysyn Raıhan men alty balamen qalǵan Nurızat búginde shańyraqtarynyń otyn sóndirmeı keledi.
Álginde aıtqanymyzdaı, áýlettiń úlkeni – Talǵat kolhozda 42 jyl mehanızator bolǵan azamat. Áýeli «Stalın» ujymsharynda, berirekte ózderiniń «Oljabaı» sharýa qojalyǵynda traktorshy bolǵan. Búginde ózderiniń sharýa qojalyǵynyń bas ınjeneri. Jary Nazgúl ekeýi 4 perzentten 16 nemere súıip otyr.
Baqılyq bolǵan Marat baýyrlary biraz jyl mektep dırektory qyzmetin abyroımen atqarǵan, shaǵyn aýyldyń jańadan ashylǵan mektebin oblysqa, qala berdi respýblıkaǵa tanytqan bilikti basshy bolǵan eken. Jary Raıhan – san jyl boıy oqýshylarǵa matematıka pániniń qyr-syryn úıretip júrgen ulaǵatty ustaz.
Al, Áset Nurmahanuly – «Asylhan» sharýa qojalyǵynyń tóraǵasy. Ol áýlettiń de, qojalyqtyń da sharýashylyq jumystaryn uıymdastyryp júr. Jubaıy Qorlan atalǵan aýyldaǵy mektepte bastaýysh synyptarǵa sabaq berip, otaǵasymen 7 ul-qyz tárbıelep ósirýde. Odan keıingi Rahym aýyldaǵy aýla klýbynyń sharýashylyq meńgerýshisi bolsa, alty balanyń anasy Aınur – kitaphanashy.
Áýlettegi barsha maldyń esebi, kútimi, jem-shóbine jaýapty Nurmat ta kelinshegi Gúlzahıra ekeýi 5 ul-qyzdy tárbıelep ósirip otyr. Kishisi Ábdýlhamıt 1 jasqa da tolmaǵan. Osylaısha, Nurmahan atadan qazirgi tańda 27 nemere, 26 shóbere tarap otyr.
– Negizinen áýletimizde «Oljabaı», «Asylhan» atty eki sharýa qojalyq bar. Biz baýyrlar men nemereler birlese, aqyldasa otyryp, sonyń jumysyn júrgizemiz. Atamyz Oljabaı qarııadan kóp taǵylym aldyq. Ákemiz Nurmahan ómirden erterek ozsa da, bizdi adaldyqqa, tatýlyqqa tárbıelep ketti. Anamyz Bazarkúl de sondaı kópshil, aqjarqyn ári minezdi, talapshyl jan edi. Biz bul kúnge osyndaı jandardyń arqasynda jetip otyrmyz. Endigi negizgi maqsatymyz, balalarymyz, nemere-shóberelerimizdiń de osy qalyptan tanbaı, ómirde basty qundylyq – yntymaq ekenin uǵyndyrý, – deıdi Talǵat Oljabaev.
Berekeli áýletpen jaqynyraq tanysyp bolǵan soń, sýretke túsirýge oqtaldyq. Biraq, sol sátte Talǵat aǵamyz: «Meniń eki inim Rahym men Nurmat sharýalarmen keshigip jatyr edi. Sýretke túspeı qalatyn boldy. Kúte tursaq jaqsy bolar edi», – dep shyr-pyr boldy. Ýaqytymyz qansha tyǵyz bolsa da, júrek jylytar baýyrmal baýyrlardyń basy qosylǵanyn qalaı kútpeısiń, mundaıda?!
Bul otbasynyń ósip-ónip, bereke men birlikte ǵumyr keship kele jatqandary da osyndaı jylylyqtyń, baýyrmaldyqtyń, tatýlyqtyń arqasy dep túsindik. Al bul izgi qasıetter barda áýlettiń mereıi qashanda ústem bolyp, baq darıtyny sózsiz.