Jambyl oblysynyń turǵyny esirtkini kirjýǵysh mashınada jasyrǵan

<p>Jedel izdestirý is-sharalarynyń nátıjesinde esirtki zattaryn asa iri mólsherde saqtady degen kúdikpen Shý aýdanynyń 37 jastaǵy turǵyny ustaldy. Ol iri kólemdegi esirtkini kir jýǵysh mashınada jasyrǵan, dep habarlaıdy <a href="Kazinform" target="_blank" rel="noopener">Kazinform</a>.</p>

Jambyldyq polıtseıler kúdiktiniń turǵylyqty jerin tintý kezinde saraıda turǵan kir jýǵysh mashınanyń ishinen 4 polıpropılen qapshyqtaǵy ósimdik tektes zat pen erekshe ıisti untaq zaty bar paket jáne untaqtaýǵa arnalǵan elek taýyp, tárkilegen.

Saraptama qorytyndysy boıynsha atalǵan zattar jalpy salmaǵy 111 keli 500 gramm keptirilgen marıhýana men jalpy salmaǵy 2 keli 960 gramm gashısh esirtkisi bolyp shyqty.

Sondaı-aq, atalǵan azamattyń jazǵy as úıdegi dıvanynyń astynan 12 mm kalıbrli "TOZ-63" markaly tirkelmegen qos aýyz tegis uńǵyly ańshy myltyǵy tabylǵan.

«Atalǵan derek boıynsha QR QK 296-babynyń 4-bóligimen sotqa deıingi tergeý amaldary bastaldy. Kúdikti óz kinásin tolyq moıyndady. Qazirgi ýaqytta ol Shý aýdany polıtsııa bóliminiń ýaqytsha ustaý ızolıatoryna qamaqqa alyndy», – dep atap ótti PD esirtki qylmysyna qarsy is-qımyl basqarmasynyń bastyǵy polıtsııa polkovnıgi Álim Bajyqbaev.