Jambyl oblysynyń dıqandary jaýyn-shashynnyń kesirinen egis naýqanynyń merziminen keshigip jatyr

<p>ASTANA. KAZINFORM &mdash; Jambyl oblysynda kópjyldyq shópter men dándi daqyldardy egý jumystary aıaqtalyp jatyr.</p>

Oblystyq aýyl sharýashylyǵy basqarmasynyń málimetinshe, bıylǵy jyly 364,7 myń gektar alqapty dándi jáne burshaq daqyldary, 190,5 myń gektardy mal azyǵy daqyldary alyp jatyr.

«Sarysý dıqandary dándi daqyldar egý josparyn 2,9 myń gektarǵa asyra oryndady. Qant qyzylshasy josparlanǵannan (123,5%) artyq egildi – 9,7 myń gektar, bul kórsetkish ótken jylmen salystyrǵanda 3,1 myń gektarǵa artyq. Bıylǵy jyly qant qyzylshasy Qordaı (750 ga), Merki (700 ga), Rysqulov (98 ga) jáne Shý (6,6 myń ga) aýdandarynda kóbirek egildi»,-dep habarlady vedomstvonyń baspasóz qyzmeti.

Búgingi tańda oblys aımaqtarynda maıly daqyldar 30,4 myń gektarǵa (66,1%), baqsha daqyldary 6,7 myń gektarǵa (85%), pııaz 15,9 myń gektarǵa (96,8%) egilgen. Baızaq aýdanynda 400 gektarǵa artyq pııaz egildi.

Óńir sharýashylyqtarynda bıyl jaýyn-shashynnyń kóp túsýine baılanysty keıbir egis alqaptary egis naýqanynan keshikti. Talas, Rysqulov, Sarysý aýdandary men Taraz qalasynda egis jumystary kesh bastaldy.

Kókónis 20,2 myń gektarǵa (88,4%) egildi, bul ótken jyldyń osy kezeńimen salystyrǵanda 10 myń gektarǵa az. Maıly daqyldar – 20,2 ga az. Kartop kórsetkishi 1,9 myń gektarǵa tómen, dep habarlady oblystyq aýyl sharýashylyǵy basqarmasy.

Jambyldyq aýyl sharýashylyǵy sýbektileri jazdyq dándi daqyldar, maıly daqyldar, qant qyzylshasy, kókónister egip, mıneraldy tyńaıtqyshtar engizýmen aınalysyp jatyr. Bıylǵy jyly 332,4 myń gektar alqapqa 53,3 myń tonna mıneraldy tyńaıtqysh engizý josparlanǵan.

Kóktemgi dala jumystaryna 7506 aýyl sharýashylyǵy tehnıkasy jumyldyrylyp, egis naýqanyna 10,8 myń tonna dızel otyny bólindi. «Keń dala» baǵdarlamasy arqyly kóktemgi dala jumystaryna 2,5 mlrd teńge bólindi.

Buǵan deıin Aýyl sharýashylyǵy mınıstrligi ákimdikterge aldaǵy jaýyn-shashyn týraly eskertken bolatyn.