Jambyl oblysyndaǵy jolda birneshe kólik soqtyǵysyp, 19 adam aýrýhanaǵa jetkizildi

<p>TARAZ. KAZINFORM - Jambyl oblysynyń Jýaly aýdanynda aýa raıynyń nasharlaýyna baılanysty Taraz qalasynan Túrkistan oblysyna qaraı, &laquo;Almaty-Tashkent&raquo; baǵytyndaǵy respýblıkalyq mańyzy bar joldyń jabyq ýchaskesinde (567 km) jappaı jol-kólik oqıǵasy boldy, dep habarlady oblystyq tótenshe jaǵdaılar departamentiniń baspasóz qyzmeti.</p>

«Qazvtojol» respýblıkalyq mańyzy bar avtomobıl joldary ulttyq operatorynyń málimetteri boıynsha, oqıǵa «Almaty-Tashkent-Termez» avtojolynyń boıynda saǵat shamamen 10:45 kezinde Taraz qalasynan 40 km qashyqtyqta bolǵan, shamamen 15-20 kólik soqtyǵysqan. Aıta ketetin másele, atalǵan jol bóliginde saǵat 10:00 men 10:30 kezinde kólik qozǵalysyna engizilgen shekteý ýaqytsha alynǵan.

Oblystyq Tótenshe jaǵdaılar departamentiniń málimetinshe, jeńil, jolaýshylar avtobýstary jáne júk kóligimen B.Momyshuly aýdandyq aýrýhanasyna túrli jaraqattarmen 19 adam jetkizilgen. Onyń bireýi bala. Sondaı-aq, Tótenshe jaǵdaılar departamentiniń kúshteri kólik arasynda qysylyp qalǵan adamdardy shyǵaryp, ózge de qutqarý jumystary júrgizilip jatyr. Qaza bolǵandar joq.

Al, Nurlykent aýylynyń Mádenıet úıindegi jylytý pýnktine 39 adam jetkizilgen, onyń ishinde 8-i bala.

Oqıǵa ornynda TJD, polıtsııa, Apattar medıtsınasy ortalyǵy, jedel medıtsınalyq kómek aýrýhanasy ókilderi kómek kórsetip jatyr.

Oblys aýmaǵynda aýa raıy jaǵdaıynyń nasharlaýyna baılanysty departament bazasynda jedel shtabtyń jumysy uıymdastyrylǵan. Psıhologııalyq qoldaý úshin senim telefonyna baılanysýǵa bolady.