Jambyl oblysynda Respýblıka kúnine oraı birneshe nysan paıdalanýǵa berildi

<p>TARAZ. KAZINFORM - Turǵyndardyń bastapqy medıtsınalyq-sanıtarlyq kómekti jaqyn jerden alýyn qamtamasyz etý maqsatynda 25-qazan Respýblıka kúnine oraı, Qordaı aýdany Masanshy aýylynda aýyldyq aýrýhana korpýsy janynan qosymsha ǵımarat salynyp, densaýlyq saqtaý salasy jańa emdeý nysanymen tolyqty.</p>

Foto: Jambyl oblysynyń ákimdigi

Emhana halyqqa qajetti ÝZI, fızıo terapııa kabıneti syndy zamanaýı qajetti quraldarmen jabdyqtalǵan. Sondaı-aq, jańa emhana aýysymyna 150 kelýshini qabyldaı alady. Buryn eski ǵımaratta qıyndyq kórgen 19537 halyq turatyn Masanshy jurtshylyǵy endi aýdan ortalyǵyna qatynamaı jańa mekemede sapaly em qabyldaı alady. Osylaısha, aýdandaǵy shalǵaı aýyl turǵyndaryna sapaly dárigerlik kómek kórsetý máselesi sheshimin taba bastady. Munda terapııa, pedıatrııa bólimsheleri bar. Atalmysh emhanada 8 dáriger, 40 meıirbıke, 21 kishi býyn qyzmetkerleri jumys isteıdi. Óıtkeni ár dárigerdiń jeke jumys kabıneti bar. Sonymen qatar, 52 tósektik emhana úsh qabattan turady. Onyń ishinde on bes oryn-táýlik boıy jumys isteıtin statsıonar, otyz bes oryn-kúndizgi statsıonar, eki pallıatıvti kómek kórsetý orny qarastyrylǵan. Nysannyń qurylys jumystary 2019 jyly qazan aıynda bastalyp, qurylysty merdiger mekeme «Samruq-Qazyna» aktsıonerlik qoǵamy júrgizdi. Jobanyń quny 530 071 650 teńgeni quraıdy.
********

Respýblıka kúni qarsańynda, Masanchı aýyldyq okrýgine qarasty Kúnbatys-1 aýylynda sý jańa shaǵyn fýtbol alańshasynyń ashylý rásimi ótti. Sharanyń ashylý saltanatyna aýdan ákiminiń orynbasary Damıra Súgirbaı, okrýg ákimi Hýseın Býlarov, aýyldyq ardagerler alqasynyń músheleri jáne aýyl turǵyndary qatysty. Aldymen aıaqdop alańynyń ashylýyna arnalǵan lenta qııý rásimi oryndaldy. Saltanatty rásimge aýdan ákiminiń orynbasary Damıra Maratqyzy, aýyl aqsaqaldary shaqyryldy.
Sondaı-aq, jergilikti bıýdjetten qarjy qaralyp, shaǵyn fýtbol alańynyń qurylys jumystaryn «TNAY story» merdigerlik mekemesi atqaryp shyqqan. Kelesi kezekte, aq jaýlyqty analar shashý shashyp, kún raıynyń jaýyn-shashyndy bolýyna qaramastan, qonaqtar jańa ashylǵan alańǵa bettedi.

********

Foto: Jambyl oblysynyń ákimdigi

25 qazan- Respýblıka kúnine oraı Merki aýdanynda jańa sport kesheni paıdalanýǵa berildi. Tátti aýylynan ashylǵan sport nysany jeke ınvestıtsııa esebinen boı kóterdi. Týǵan jerine týyn tigip, aýyl sportynyń damýyna úlken úlesin qosýdy maqsat etip, “Alpamys” balalar men jasóspirimder dene daıarlyq klýbyn el ıgiligine berip otyrǵan Tátti aýylynyń týmasy Kókebaev Baqyt Kerimbaıuly. Ǵımarattyń ashylýyna aýdan ákiminiń orynbasary Ernar Ǵalıuly, aýyl aqsaqaldary, turǵyndar qatysyp, lentasyn qıdy.
Jańa nysanda 5 sport sektsııasy bar. Qazaqsha kúres, erkin kúres, ústel tennısi, boks, qol kúresi sekildi sport túrlerimen shuǵyldanýǵa jaǵdaı jasalǵan. ⠀Sonymen qatar, jańa sport nysanynda 17 maman jumyspen qamtyldy.⠀

********
Talas aýdany Aqtóbe aýylynyń halqyna taza aýyz sý berildi. Respýblıka kúnine oraı Talas aýdany Qyzyláýit aýyldyq okrýgine qarasty Aqtóbe aýylynyń halqyna sapaly aýyz sý berildi. Bıyl «Forte Sapital» JShS-i qysqa merzim ishinde keshendi blok-modýl ornatty. Bul qurylǵy turǵyndardyń sapaly tirshilik nárimen qamtylýyna yqpal etedi. Joba quny 129,5 mln.teńgeni quraıdy.
Búginde Talas aýdanynyń 6 aýyldyq eldi mekeninde (Seıibek, Qojaǵappar, Turymqul, Qaraoı, Aral, Qaıyr aýyldary) aýyz sý nysandarynyń qurylysy júrgizilýde. Aıta keteıik, Jambyl oblysynda bıyl 22 aýylǵa ortalyqtandyrylǵan sýmen jabdyqtaý júıesin salý, 15 aýylǵa keshendi blok-modýl ornatý josparlanǵan. Nátıjesinde halyqty sapaly aýyz sýmen qamtý deńgeıi 94,9-dan 98,1 paıyzǵa deıin artady.

********
Respýblıka kúnine oraı T. Rysqulov aýdany Qaıyńdy aýylynda joba quny 249,2 mln teńgeni quraıtyn 15 kelýshige arnalǵan feldsherlik-akýsherlik pýnkt ashyldy.
Bul aýdanda sońǵy jyldary salynyp, el ıgiligine berilgen úshinshi – medıtsınalyq pýnkt. Odan bólek, qazirgi ýaqytta Qoraǵaty stantsııasy men Aqbulaq aýyldarynda da dál osyndaı nysandardyń qurylysy júrgizilýde.
Aýdannyń damý josparyna sáıkes 2027 jylǵa deıin taǵy 5 medıtsınalyq pýnkt salý josparlanyp otyr.
Aǵymdaǵy jyly oblysta densaýlyq saqtaý uıymdarynyń tozýyn 40,3%-dan 39,0%-ǵa deıin tómendetý úshin 26 densaýlyq saqtaý nysanyn salý josparlanýda, onyń ishinde «Aýyldyq densaýlyq saqtaýdy jańǵyrtý» jobasy sheńberinde - 20 nysan boı kóteredi.
Búginde, 3 medıtsınalyq nysan halyq ıgiligine berildi.

 

Materıaldy Jambyl oblysy ákimdigi usynǵan