Jambyl oblysynda erte júktilik máselesi órship tur

<p>Jambyl oblysynyń ákimi Erbol Qarashókeev oblysta kámeletke tolmaǵan jasóspirimderdiń júktiligi máselesimen qalaı kúresetinin aıtty, dep habarlaıdy <a href="Kazinform" target="_blank" rel="noopener">Kazinform</a>.</p>

«Statıstıka boıynsha Jambyl oblysy ótken jyly jasóspirim qyzdar arasyndaǵy júktilik sany boıynsha kósh bastap turǵan úshtikke kirdi. Bılik bul tendentsııamen kúresip jatyr ma? Oblystyń bul máselede kóshbasshy atanýy nemen baılanysty?», - dep suraq qoıdy tilshiler Ortalyq kommýnıkatsııalar qyzmetinde.

Óz jaýabynda E. Qarashókeev oblysta kámeletke tolmaǵan qyzdardyń júktiligi úlesi óte joǵary ekenin moıyndady.

«Sondyqtan bul máselege keshendi túrde qaraǵan jón. Birinshiden, balalarmen de, jasóspirimdermen de durys aǵartýshylyq jumys júrgizý. Ekinshiden – eger osy másele aıasynda zańnama buzylsa, muǵalimderdi, osy protsesti baqylaýǵa mindetti barlyq adamdardyń jaýapkershiligi kúsheıtilip, eshkim jazadan bultarmaýy kerek. Munda biz jan-jaqty jumys istep jatyrmyz, barlyq qajetti sharalardy ótkizýdemiz. Meniń oıymsha, bul máseleni sheshýdiń oń dınamıkasy qazirdiń ózinde kórine bastady. Bilim basqarmalarynda jáne basqa vedomstvolarda jaýapty mamandar jumys istep jatyr», - dep jaýap berdi Erbol Qarashókeev.

Oblys ákimi naqty statıstıka men tsıfrlardy keıinirek beretinin, degenmen erte júktilik sany óspegenin aıtty.

«Áıtse de faktiler bar, joǵaryda aıtylǵan máseleler áli de ózekti. Sondyqtan meniń oıymsha, bizde áli jumys kóp», - dedi Jambyl oblysynyń ákimi.

Eske sala ketsek, 22 qarasha kúni Jambyl oblysy Sarysý aýdany Jańatas qalasynda 13 jasar oqýshyǵa túsik jasalǵan edi. Bul týraly oqýshynyń ata-anasyna habar berilmeı, mektep-ınternat ákimshiligi jeke gınekologqa júgingen.