Jambyl oblysynda aýyz sýdy tehnıkalyq maqsatqa paıdalanǵan 25 kásipkerge aıyppul salyndy
Baspasóz qyzmetiniń málimetterine qaraǵanda, sý zańnamasyn buzǵan tutynýshylardyń árqaısysyna 74 myń teńgege jýyq aıyppul salynyp, «Jambyl sý» mekemesine atalǵan sý paıdalanýshylarmen kelisim shartty buzý usynyldy.
Budan bólek, ótken jyly 14 shaǵyn kásipkerlik nysanynyń jerasty sýlaryn zańsyz paıdalanyp kelgeni anyqtaldy. Sý zańnamasyn buzǵandardyń qatarynda monsha, kólik jýý jáne ózdiginen kólik jýý syndy mekemeler bar. Olarǵa jalpy somasy 759 myń teńge aıyppul salynyp, tolyq óndirildi.
Óńirde jerasty sýyn ruqsatsyz paıdalanýshylarǵa arnaıy sý paıdalaný ruqsatyn rásimdeý týraly túsindirý jumysy júrgizildi. Nátıjesinde, Jambyl oblysy boıynsha 27 kólik jýý, basseın jáne monshalardyń menshik ıeleri arnaıy sý paıdalaný ruqsatyn rásimdedi.
Aıta ketý kerek, Taraz qalasynda 34 basseın, 137 monsha kesheni, 146 kólik jýý oryndary bar.
«Sýdyń «qara naryǵyn» joıý jáne onyń shyǵynyn baqylaýdy qamtamasyz etý úshin Sý resýrstary jáne ırrıgatsııa mınıstrligi basseındik ınspektsııa shtatyn 1,5 ese kóbeıtti. Máselen, Shý-Talas basseındik ınspektsııasynda qyzmetkerler sany 15 mamanǵa kóbeıip, shtat sany 25 adamǵa jetti. Onyń ishinde memlekettik ınspektorlar sany 13 adamǵa deıin artty. Óńirde sý zańnamasy talaptarynyń saqtalýy qatań baqylaýda bolýy kerek jáne sý paıdalanýshylar arasynda túsindirý jumystaryn júrgizý qajet», - dedi Sý resýrstary jáne ırrıgatsııa mınıstri Nurjan Nurjigitov.