Jambyl oblysynda 99% tolǵan sý qoımalary bar
Jambyl oblysyndaǵy atalǵan sý qoımalary men bógetter aerovızýaldy baqylaýda, ondaǵy sý kólemine udaıy monıtorıng júrgizilýde. Ázirge jaǵdaı turaqty.
Oblysta sý tasqyny kezeńin shtattyq rejımde ótkizý maqsatynda is-sharalar jospary jáne kezekshilik kestesi bekitilgen.
«Oblysymyzdyń eń úlken sý qoımalary — Tasótkel, Teris-Ashybulaq jáne Talas ózeniniń negizgi sý kózi bolyp tabylatyn Kırov sý qoımasyn toltyrý bekitilgen kestege sáıkes atqarylýda. Tasótkel sý qoımasy búgingi kúnge 94% tolǵan. Tehnıkalyq jaǵdaıyna baılanysty ruqsat etilgen kólemine deıin áli 30 mln tekshe metr sý qabyldaı alady. Sý ótkizý qabileti sekýndyna 360 tekshe metr. Appattyq sý ótkizý qabileti sekýndyna 380 tekshe metr. Teris-Aşybulaq sý qoımasy ruqsat etilgen kóleminen 97% toldy. Kelip jatqan sý kólemi — sekýndyna 15,9 tekshe metr, tastalyp jatqan sý kólemi de osy mólsherde. Sý qoımanyń barlyq sý ótkizý qabileti — sekýndyna 622 tekshe metr, al túsip jatqan sý kólemi — sekýndyna 15,9 tekshe metr ekenin eskersek, búgingi tańda qaýip joq deýge bolady. Sý qoıma tranzıttik rejımde jumys atqarýda, — deıdi Jambyl oblysy nótenshe jaǵdaılar departamenti bastyǵynyń orynbasary, polkovnık Rýslan Orynbekov.
Sondaı-aq, TJ departamenti bastyǵynyń orynbasarynyń aıtýynsha, Qaraqońyz, Qaqpatas sý qoımalary 99%, Yntaly — 97%, Kırov — 81% tolǵan. Degenmen, túsip jatqan sý kóleminiń mólsherine qaraı qaýip joq.
Al, Búrkitti, Jartas syndy sý qoımalaryndaǵy jáne kishi ózen-kólderdegi sý kólemi 50 paıyzdan da tómen bolǵandyqtan, kerisinshe, sý jetkizý boıynsha jumystar atqarylyp jatyr eken.
«Sý toraptar, sý qoımalar boıynsha segmenttik qaqpanyń jumysy, onyń ashylyp-jabylý rejımi, qaqpa kóteretin motorlardyń maılanyp, jumys isteýi tekserildi. „Qazsýshar“ RMK Jambyl fılıalynyń teńgerimindegi 7 sý qoımasynyń jumys isteý grafıgi jasalyp, sý tasqynyn aldyna alý boıynsha kezekshilik uıymdastyrlyp, qatań baqylaýǵa alyndy. Sý qoımalar tranzıttik rejımge aýystyryldy», — dep túsindirdi Rýslan Orynbekov.
Al «Qazsýshar» RMK dırektory Asqanat Qadyrov óńir eldi mekenderinde sý basýdy aldyn alý maqsatynda 3500 tonna qar shyǵarylyp, 1790 km kanal, 1833 km aryq, 437 km drenaj júıesi, 946 sý ótkizý qurylystary tazartylyp, aýyldardyń aınalasynda 10 shaqyrym úıindi jasalǵanyn aıtady.
Sondaı-aq, sý basý qaýpi bar 42 eldi mekenniń 34-inen qaýip alynypty.
«Óńirde sý tasqynyń aldyn alý jáne joıý maqsatynda 1927 adam, 437 tehnıka, 19 júzý quraly, 132 motopompa, halyqty evakýatsııalaýǵa jáne jeke quramdy tasymaldaýǵa arnalǵan 48 jolaýshylar kóligi daıyn. 6 900 tonna ınertti materıal, 16 140 tonna janar-jaǵarmaı, 31 200 dana qap qajetti rezervi qurylyp, 396 adam sııatyn halyqty qabyldaý pýnkti, 32 shatyr, 890 tósek-oryn, 460 kereýet daıyndalyp, tamaqtandyrý boıynsha 58 kelisim jasaldy.Tótenshe jaǵdaılar oryn alǵan Aqmola óńirine kómekke oblystyq tótenshe jaǵdaılar departamentinen 57 jeke quram men 7 birlik kúshter men quraldar toby, 13 motopompa jáne 3 úrlemeli qaıyq jiberildi», — dedi Asqanat Qadyrov.