Jambyl oblysy: 852 nysan múmkindigi shekteýli jandarǵa tolyq beıimdeldi

<p>ASTANA. KAZINFORM - Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Jambyl oblysynda 852 áleýmettik ınfraqurylym nysany tolyq beıimdeldi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.&nbsp;</p>

Qazirgi ýaqytta elimizde Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar, «Amanat» partııasynyń 2023 – 2027 jyldardaǵy jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.

«Amanat» partııasynyń jol kartasynda 2023 – 2027 jyldar aralyǵynda Interaktıvti qoljetimdilik kartasyna (budan ári – Karta) engizilgen 35 myńnan astam nysandy beıimdeý boıynsha jumys kózdelgen. Jyl saıyn obektilerdiń 20 %-y beıimdelýge jatady.

Osylaısha, 2023 jyly – Kartadaǵy obektilerdiń 20%, 2024 jyly – 40%, 2025 jyly – 60%, 2026 jyly – 80%, 2027 jyly – 100%. Qazirgi ýaqytta el boıynsha 16 541 obekt tolyǵymen beıimdelgen.

Osy jyldyń sońyna deıin Jambyl oblysy boıynsha 562 nysandy beıimdeý josparlanǵan, óńirde jospar artyǵymen oryndalyp, 852 nysanda beıimdeý jumystary júrgizildi.

Máselen, óńirdegi 852 obektiniń ishinen tómendegi obektiler múgedektigi bar adamdardyń barlyq sanattary úshin qoljetimdi:

- densaýlyq saqtaý obektileri – 119;

- bilim berý obektileri – 300;

- mádenıet obektileri – 102;

- saýda jáne qyzmet kórsetý obektileri – 31;

- memlekettik uıymdar – 236;

- sport obektileri – 33;

- kólik ınfraqurylymynyń obektileri – 8;

- áleýmettik qorǵaý obektileri – 7;

- basqalary – 16.

«Men Taraz qalasynda turamyn jáne kún saıyn ártúrli áleýmettik mańyzy bar mekemelerge – dúkenderge, dárihanalarǵa, aýrýhanalarǵa barý qajettiligin sezinemin. Árıne, men úshin barǵan kezde obektilerdiń qoljetimdi bolýy óte mańyzdy. Jaqynda men balabaqshalar da, mektepter de múgedektigi bar adamdar úshin qoljetimdi bolǵanyn baıqadym. Kóptegen áleýmettik obektilerge kirý kezinde qadamdar týraly eskertýler bar, kórsetkishter bar, bul da óte yńǵaıly. Múgedektigi bar adamdar úshin áleýmettik ınfraqurylym obektilerine kedergisiz qol jetkizý úshin barlyq jaǵdaı jasalyp jatqany qýantady», – dedi 1-toptaǵy múgedek Móldir Tájibekova.

Budan basqa memlekettik baqylaý sheńberinde Halyqty áleýmettik qorǵaý salasyndaǵy retteý jáne baqylaý komıtetiniń Jambyl oblysy boıynsha departamenti bıyl memlekettik basqarý, densaýlyq saqtaý, áleýmettik qorǵaý, mádenıet, jeke kásipkerlik jáne t.b. salalardaǵy áleýmettik ınfraqurylym obektilerine 146 tekserý júrgizdi, onyń ishinde jospardan tys 6 tekserý, profılaktıkalyq baqylaý boıynsha 37 tekserý boldy.

Tekserý qorytyndysy boıynsha anyqtalǵan buzýshylyqtardy joıý týraly 33 uıǵarym berilip, 11,8 mln teńgeden astam somaǵa 18 ákimshilik aıyppul salyndy.

Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpastan joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynady.