Jalpyulttyq qundylyqtardy nasıhattaýǵa áıelder qoǵamy óz úlesin qosady - G. Ábdiqalyqova (FOTO)

ASTANA. QazAqparat - Búgin Astanada QR Memlekettik hatshysy Gúlshara Ábdiqalyqovanyń qatysýymen QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy ótti.

«Bizdiń aldymyzda sizdermen birlesip atqaratyn eleýli mindetter tur. Táýelsizdigimizdiń bıylǵy shırek ǵasyrlyq mereıtoıy jańa belesterdi baǵyndyryp, kókjıekterdi keńeıtýge múmkindik beredi. Bul oraıda Elbasymyz Nursultan Nazarbaev belgilep bergen Ult josparyn oryndaýdyń mańyzy zor. Sondaı-aq jalpyulttyq qundylyqtardy nasıhattaýda Uly Dala eli ıdeıalaryn júzege asyrý orasan zor yqpal etedi dep oılaımyn. Elimizdi jarqyn bolashaqqa bastaıtyn bul qundylyqtardy nasıhattaýǵa áıelder qoǵamy da óz úlesin qosady dep senemin», - dedi G. Ábdiqalyqova.

Atap aıtqanda, otyrysta genderlik bıýdjetteý men ony Qazaqstanda engizýdiń keleshegi qaraldy.

Budan bólek, jıyn barysynda erlerdiń reprodýktıvti densaýlyǵyn jaqsartý jónindegi sharalar talqylandy. Densaýlyq saqtaý jáne áleýmettik damý mınıstrligi málimetine qaraǵanda, elimizde erlerdiń reprodýktıvti júıesi aýrýlary tynys alý organdarynyń, qan aınalymy júıesi men as qorytý aýrýlarynan keıingi taralýy boıynsha tórtinshi oryn alady.

Munymen qosa, otyrysqa qatysýshylar turmystyq zorlyq-zombylyq qurbandaryna arnalǵan daǵdarys ortalyqtarynyń jumysyn qarastyrdy. Búginde elimizde 28 daǵdarys ortalyǵy bar. Bul ortalyqtarda 2015 jyly zorlyqtyń qurbandaryna kómek kórsetý maqsatynda 211maman tartylyp, 16,8 myń áıelge keńes berildi.