Jalpy somasy 420 mlrd. teńgeni quraıtyn jer telimi memleketke qaıtaryldy - A.Daýylbaev

ASTANA. QazAqparat - 2012 jyldan beri jalpy somasy 420 mlrd. teńgeden astam teńgeni quraıtyn jer telimi memleketke qaıtaryldy. Bul týraly búgin QR Bas prokýratýrasynyń aǵymdaǵy jyldyń 1-shi jartyjyldyǵyndaǵy jumys qorytyndysyn talqylaýǵa arnalǵan keńeıtilgen jıynynda vedomstvo basshysy Ashat Daýylbaev málim etti, dep habarlaıdy QR Bas prokýratýrasynyń baspasóz qyzmetinen habarlady.

«Memleket basshysynyń paıdalanylmaı jatqan jerlerdi memleket menshigine qaıtarý jónindegi tapsyrmasyn oryndaý jumystary jalǵasýda. Prokýratýra bul saladaǵy alypsatarlyqtyń jolyn kese aldy. 2012 jyldan beri jalpy somasy 420 mlrd. teńgeden astam qarjyny quraıtyn jer telimi memleketke qaıtaryldy», - dedi ol.

Máselen, Bas prokýrordyń atap ótýinshe, Almaty oblysynda «GateCity» jobasy qurylysy úshin qymbattatylǵan baǵamen úsh jer telimi satyp alynǵan. Osyǵan oraı qazirgi ýaqytta prokýratýra organdary zańsyz tólengen somany óndirý týraly sotqa talap aryz berdi. Atalǵan mámiledegi asyra kórsetilgen soma 900 mln. teńgeden asyp jyǵylady.

Igerilmeı jatqan jerlerdi memleketke qaıtarý jumystary Batys Qazaqstan oblysynda da durys jolǵa qoıylǵan. Atap aıtqanda prokýrorlar kadastrlyq quny 3,5 mlrd. teńgeni quraıtyn 990 paıdalanylmaı jatqan aýyl sharýashylyǵy jerin anyqtap otyr. Qazirdiń ózinde kadastrlyq quny shamamen 2 mlrd. teńgeni quraıtyn 272 ýchaske memleketke qaıtaryldy.