Jalpy kınoprokattaǵy qazaqstandyq fılmderdiń úlesi qandaı – mınıstrlik jaýaby
«Qazir otandyq kınematografııada kınematografıster qyzmetiniń belsendiligi baıqalady. 2020 jyly 273 fılm shyǵaryldy, onyń ishinde qazaqstandyq kıno – 36, al 2021 jyly 354 fılm, onyń ishinde 31 - qazaqstandyq fılm. 2022 jyly kınoteatrlarda 449 fılm shyǵaryldy, onyń 60-y otandyq. Ótken jyly jalpy kınoprokattaǵy otandyq fılmderdiń úlesi shamamen 14,5%-dy qurady. Mádenıet jáne sport mınıstrligi Mádenıet saıasaty tujyrymdamasy sheńberinde otandyq fılmderdiń úlesin birtindep arttyrý sharalaryn qarastyrady» - delingen mınıstrliktiń QazAqparat tilshisiniń suraýyna bergen jaýabynda.
Tujyrymdama sheńberinde mádenıet jáne sport mınıstrligi 2030 jylǵa qaraı otandyq fılmderdiń, onyń ishinde anımatsııalyq fılmderdiń úlesin jalpy kınoprokatta 35 paıyzǵa deıin jetkizýdi josparlap otyr. Osy kórsetkishti iske asyrý úshin barlyq otandyq kınoındýstrııalyq kompanııalardy qamtı otyryp, ulttyq fılmder shyǵarý boıynsha júıeli memlekettik qoldaý usynylady.
«Sondaı-aq, otandyq fılmder túrli kınoprokat platformalarynda usynylatyn bolady. Budan basqa, qazaqstandyq kıno kúnderin uıymdastyrý, otandyq fılmderdiń halyqaralyq kınofestıvalder men kıno naryqtaryna qatysýyn qamtamasyz etý arqyly qazaqstandyq fılmderdi shetelde ilgeriletý jóninde sharalar qabyldanatyn bolady», - dep málimdedi vedomstvodan.