Jalpyǵa birdeı deklaratsııa: 2,1 mln qazaqstandyq tabysyn rastady

<p>ASTANA. KAZINFORM &ndash; Bıyl 10 aıdyń ishinde 2,1 mln adam tabysyn kórsetip, deklaratsııa tapsyrdy. Tolyǵyraq Qarjy mınıstrligi Memlekettik kirister komıtetiniń jeke tulǵalardyń tabystaryn ákimshilendirý basqarmasynyń bas sarapshysy Ersaıyn Kóptileýuly aıtyp berdi.</p>

«2021 jylǵy 1 qańtardan bastap Qazaqstanda kezeń-kezeńimen jalpyǵa birdeı deklaratsııalaý engizildi. Birinshi kezeńde, 2021 jylǵy 1 qańtardan bastap aktıvter men mindettemeler týraly «kirý» deklaratsııasyn 580 myńǵa jýyq memlekettik qyzmetshi jáne olarǵa teńestirilgen adamdar, sondaı-aq, olardyń jubaılary tapsyrdy. Ekinshi kezeńde, 2023 jylǵy 1 qańtardan bastap deklaratsııany beırezıdentterdi qospaǵanda, memlekettik mekemeler men kvazımemlekettik sektordyń qyzmetkerleri, sondaı-aq olardyń jubaılary shamamen 2,1 mln jeke tulǵa usyndy», - dedi Ersaıyn Kóptileýuly kirister komıtetinde ótken baspasóz máslıhatynda.

Bıyl kommertsııalyq emes uıymdardyń múshelerin qospaǵanda, zańdy tulǵalardyń basshylary, quryltaıshylary, jeke kásipkerler men olardyń jubaılary deklaratsııa tapsyrǵan.

«2024 jylǵy 27 qazandaǵy jaǵdaı boıynsha 2,1 mln adam deklaratsııa tapsyrdy», - deıdi ol.

Aıta ketsek, jalpyǵa birdeı deklaratsııa aıasynda qazaqstandyqtardyń múlki týraly 80 elden málimet túsedi.