«Jalǵyz reındjer» fılminiń qazaq tilindegi nusqasy kórermenderge jol tartty
«Bolashaq» qaýymdastyǵy men «MARWIN» kompanııasy kópshilik nazaryna «Jalǵyz reındjer» fılmin usynady, onda basty róldi belgili gollıvýdtyq akter Djonnı Depp oryndaıdy. Joba «Nur Otan» halyqtyq demokratııalyq partııasy men «Samuryq-Qazyna» qorynyń qoldaýymen iske asyryldy»,-delingen taratylǵan málimette.
2013 jylǵy 2 shildede Astana jáne Almaty qalalarynda álemdik premeradan bir kún buryn dýblıaj jasaǵan akterlerdiń, Qazaqstannyń zııaly, isker jáne saıası ortasynyń ókilderiniń qatysýymen fılmniń aldyn ala kórsetilimi ótkizildi. Kórsetilimge qazaq tilin damytý úshin osy jobalardy iske asyrýǵa jetekshilik jasap otyrǵan «Nur Otan» partııasy Tóraǵasynyń birinshi orynbasary, «Bolashaq» qaýymdastyǵy Keńesiniń tóraǵasy Baýyrjan Baıbek qatysty. «Jalǵyz reındjer» - qazaq tiline aýdarylǵan altynshy gollıvýdtyq fılm. Bul qazaq tildi kıno áýesqoılary aýdıtorııasyn keńeıtýge múmkindik beredi, memlekettik tildi damytýda mańyzdy qadam bolyp tabylady. «Nur Otan» partııasy qoǵamymyzdyń mádenı, otbasylyq qundylyqtaryn saqtaýǵa belsene aralasýda», - dep atap kórsetti Baýyrjan Baıbek.
2011 jyldan bastap «Kólikter-2», «Qara kıimdiler-3», «Batyl júrek», «Jańa Órmekshi adam» fılmderi qazaq tiline dýblıajdandy. Astana kúni qarsańynda «Bolashaq» qaýymdastyǵy áriptesterimen birge qazaqstandyqtarǵa 2013 jyldyń jańalyǵy - «Monstrlar Ýnıversıteti» jáne «Jalǵyz reındjerdi» syıǵa tartty.
Qazaqstanda «Jalǵyz reındjer» Ǵ. Músirepov atyndaǵy balalar men jasóspirimder teatrynyń akteri Beıbit Kamaranovtyń daýysymen sóıleıdi. Úndis Tontony «Jaýjúrek myń bala» fılminde basty rólderdiń birin somdaǵan Berik Aıtjanov dýblıaj jasady, onyń daýysyn Djonnı Depp ózi bekitti. Basty jaǵymsyz keıipkerlerdi M. Áýezov atyndaǵy drama teatrynyń akteri, QR eńbek sińirgen ártisi Tólebek Aralbaev pen Ǵ. Músirepov atyndaǵy balalar men jasóspirimder teatrynyń akteri, QR eńbek sińirgen ártisi Baltabaı Seıitmamytov dybystady. Barlyǵy jobaǵa 28 akter qatysty.
Avtordyń oıyn tolyq jetkizý úshin aǵylshyn tilinen tikeleı qazaq tiline aýdarma jasaldy, bul dısneılik jańa kıno keıipkerleri sóılegen 22-shi til boldy. Fılmniń dýblıajy qazaqstandyq Cinema Tone Production stýdııasynda júrgizildi, qazaq nusqasynyń rejısseri Aıjan Jámshıtova, redaktor-qalyptaýshylary - Turysbek Sáýketaev pen Saltanat Dúngenbaeva.